కాలుష్యంపై.. యువకుడి ఒంటరి పోరాటం!

కశ్మీర్‌లో అతి పెద్ద వూలర్ సరస్సును ఈ కుర్రాడు ఒక్కడే శుభ్రం చేస్తున్నాడు. రోజూ పడవలో ప్రయాణిస్తూ నదిలో ఉండే చెత్తను తొలగిస్తూ నలుగురికి ఆదర్శంగా నిలుస్తున్నాడు. ఈ కుర్రాడి శ్రమను గుర్తించిన శ్రీనగర్ మున్సిపల్ కార్పొరేషన్ (SMC).. ఆ యువకుడిని చెత్త రహిత కశ్మీర్‌కు ప్రచారకర్తగా ఎంపిక చేసింది. 18 ఏళ్ల బిలాల్ అహ్మద్ దర్ తండ్రి క్యాన్సర్ వ్యాధితో చనిపోయాడు. దీంతో కుటుంబ భారమంతా బిలాల్‌పైనే పడింది.

ఎక్కడా పని దొరక్క.. పేదరికంతో అల్లాడిపోయిన బిలాల్ చదువుకు స్వస్థి చెప్పి.. చెత్త ఏరే పని ఎంచుకున్నాడు. అయితే, చెత్తతో నిండిపోయిన వులార్ లేక్‌ను చూసి ఆందోళన చెందాడు. దీంతో రోజంతా పడవలో తిరుగుతూ.. నదిలో వ్యర్థాలు లేకుండా చూస్తున్నాడు. ఈ సందర్భంగా శ్రీనగర్ మున్సిపాలిటీ బిలాల్‌ను ప్రచారకర్తగా ఎంపిక చేసుకుని.. నగర పరిశుభ్రత కోసం ప్రచారం చేయిస్తోంది.

‘చెత్త’ వల్ల తనకు వచ్చే లాభమే కాదు, పర్యవరణానికి కలిగే నష్టం గురించి కూడా అవగాహన ఉన్న బిలాల్... చెత్త రహిత కశ్మీర్ కోసం తన గలం వినిపిస్తున్నాడు. ‘‘ఈ సరస్సును నేను శుభ్రం చేస్తున్నా.. ఇందుకు ప్రతిఫలంగా నాకు ఎంతోకొంత సొమ్ము వస్తోంది. ఈ సరస్సులో పాడేస్తున్న ప్లాస్టిక్ బాటిళ్లు, చెత్తా చెదారం నీటిని విషంలా మార్చేస్తున్నాయి. మేం తాగేందుకు వాడే ఈ నీరు ఇలా కలుషితం కావడం నాకు ఇష్టం లేదు. అందుకే, రోజంతా ఈ పనిలోనే ఉంటున్నా’’ అని బిలాల్ తెలిపాడు.