వర్ధమాన సినీ నటిపై దౌర్జన్యం..

ఒక వర్ధమాన నటి (23)పై ఇద్దరు పరిచయమున్న వ్యక్తులే అఘాయిత్యం చేయబోయారు. సినిమా షూటింగ్ ముగించుకొని క్యాబ్‌ దిగి ఇంటికి వెళుతున్న సమయంలో నిందితులు నడిరోడ్డుపై ఆమెను అడ్డగించారు. ఇద్దరూ చెరో చేయి పట్టుకొని ఆమెను తమతో రమ్మని బలవంతంగా లాగారు. ఆ నటి తీవ్రంగా ప్రతిఘటించడంతో నిందితులిద్దరూ ఆమెపై దాడి చేసి, పరారయ్యారు. ఈ ఘటన బెంగళూరులో జరిగింది.

నటి ఫిర్యాదు మేరకు పోలీసులు నిందితులను సోమవారం (మే 1) అరెస్టు చేశారు. ‘ఆ దుర్మార్గులు నాతో చాలా అసహ్యంగా ప్రవర్తించారు. వాళ్లు చేసిన కొన్ని పనులను చెప్పుకోలేను’ అని బాధితురాలు ఆవేదన వ్యక్తం చేసింది. నడిరోడ్డుపై అమర్యాదకరంగా ప్రవర్తించడంతో బతకాలనిపించలేదని ఆమె కన్నీరు పెట్టుకుంది. ఆత్మహత్య చేసుకోవాలని ఆలోచించానని, కుటుంబ సభ్యులు ధైర్యం చెప్పడంతో విరమించుకున్నానని ఆమె పోలీసులకు చెప్పింది.

మరోవైపు.. ఆమె తమకు నగదు చెల్లించాల్సి ఉంది, రుణం ఇవ్వాలని డిమాండు చేసినందుకే ఇప్పుడు ఈ ఆరోపణ చేసిందని నిందితులు వాపోతున్నారు. పోలీసులు కేసు దర్యాప్తు చేస్తున్నారు.