ఆసుపత్రి నుంచి మోగ్లీ గర్ల్ డిశ్చార్జ్!

ఎనిమిదేళ్ల అమ్మాయి కోతులతో కలిసి జీవిస్తూ పోలీసులకు కంటపడడం, ఆమెను వారు రక్షించడం... మనందరికి తెలిసిన సంగతే. జనవరిలో యూపీలో బహ్రెయిచ్ అడవిలో తిరుగుతున్న ఆమెను పెట్రోలింగ్ చేస్తున్న పోలీసులు చూశారు. అతి కష్టమ్మీద ఆమెను కోతుల నుంచి విడదీసి ఆసుపత్రికి తీసుకొచ్చారు. రెండు నెలల నుంచి ఆమె ఆసుపత్రిలోనే చికిత్స పొందుతోంది. సోమవారం ఆమెను ఆసుపత్రి నుంచి డిశ్చార్జి చేశారు. బెలూన్స్ అనే షెల్టర్ హోమ్ కు తరలించారు. రెండు నెలలుగా ఆమెకు ఎంతో చికిత్స అందించారు వైద్యులు. చాలా ఏళ్లు అపరిశుభ్ర ఆహారం తినడంతో ఆమె కడుపులో పురుగులు పట్టాయి. డయేరియా కూడా ఉంది. అలాగే ఒంట్లో హిమోగ్లోబిన్ శాతం ఉండాల్సిన దాని కన్నా చాలా తక్కువగా ఉంది.


ఆసుపత్రికి తీసుకువచ్చిన మరుసటి రోజు నుంచే మోగ్లీ గర్ల్ కు వాంతులు అవ్వడం ప్రారంభమయ్యియి. పొట్టలో ఉన్న పురుగుల కారణంగా అలా వాంతులు అవుతుండడంతో వైద్యులు చికిత్స అందించారు. పురుగులు బయటికి వచ్చేందుకు ట్యాబ్లెట్స్ అందించారు. దీంతో మూడు నుంచి అయిదు సెంటీమీటర్ల పొడవుండే పురుగులు బయటికి వచ్చినట్టు వైద్యులు తెలిపారు. ప్రస్తుతం ఆమె ఆరోగ్య పరిస్థితి నిలకడగా ఉన్నట్టు వైద్యులు చెప్పారు. అందుకే డిశ్చార్జ్ చేసి షెల్టర్ హోమ్ కి పంపించామన్నారు. అక్కడికి పంపించేముందు మోగ్లీ గర్ల్ పొట్టకి, మెదడుకి సీటీ స్కాన్ తీశారు వైద్యులు. మెదడు ఎదుగుదల, పొట్టలోని ఇంకా ఏమైనా ఇన్ఫెక్లన్లు ఉన్నాయేమో తెలుసుకోవాలనుకుంటున్నారు.