భర్తను చంపి.. సెప్టిక్ ట్యాంక్‌లో పూడ్చేసింది!

ఓ మహిళ తన భర్తను హత్యచేసి, సెప్టిక్ ట్యాంకులో పూడ్చేసిన ఘటన ఒకటి 13 ఏళ్ల తర్వాత వెలుగులోకి చూసింది. వివరాల్లోకి వెళితే.. ముంబయిలోని గాంధీపడలో ఫరీదా భారతి అనే మహిళ ఇంట్లో వ్యభిచారం నిర్వహించడమే కాకుండా తన భర్తతో సహా అనేక మందిని హత్య చేసిందనే సమాచారం పోలీసులకు తెలిసింది. దీంతో పోలీసులు బుధవారం ఆమె ఇంట్లో సోదాలు చేయగా.. సెప్టెక్‌ ట్యాంకులో పుర్రె, అస్థిపంజరం బయటపడ్డాయి. భర్త సహదేవ్ (30) నిద్రలో ఉండగా తలపై కొట్టి చంపినట్టు ఫరీదా పోలీసు విచారణలో తెలిపింది.

ఫరిదా ఇంట్లో వ్యభిచారం జరుగుతోందన్న సమాచారంతో పోలీసులు మంగళవారం దాడి చేశారు. ఈ సందర్భంగా ఫరీదాతో పాటు ఓ విటుడిని పోలీసులు అదుపులోకి తీసుకున్నారు. ఆమె ఆధీనంలో ఉన్న నలుగురు మహిళలకు వ్యభిచార కూపం నుంచి విముక్తి కల్పించారు. విచారణలో ఆమె భర్తను చంపిన విషయం తెలిసింది. దీంతో మళ్లీ ఆ ఇంట్లో సోదాలు చేయగా సహదేవ్ అస్థికలు సెప్టిక్ ట్యాంకులో కనిపించాయి. అయితే, ఎందుకు చంపిందో కారణాలు తెలియరాలేదు. పోలీసులు కేసు నమోదు చేసి విచారణ జరుపుతున్నారు.