అమెరికాలో ముస్లిం విద్యార్థినికి అవమానం

ముస్లింలకు తీవ్ర వ్యతిరేకిగా పేరు పొందాడు ట్రంప్. తాజా ఎన్నికల్లో అతనే ప్రెసిడెంట్‌గా గెలవడం అమెరికాలో నివసిస్తున్న చాలా మంది ముస్లింల గుండెల్లో గుబులు పుట్టింది. ఆ గుబులుకు తగ్గట్టే సంఘటనలు జరుగుతున్నాయి. మిన్నెసోటాలోని కూన్ రాపిడ్స్ లో ఉన్న నార్త్ డేల్ మిడిల్ స్కూళ్లో ఈ ఘటన ఓ ముస్లిం విద్యార్థిని చదువుకుంటోంది. ఆమె రోజూ హిజాబ్ (బుర్ఖా) ధరించి స్కూలుకి వస్తుంది. కాగా ఓ అమెరికన్ విద్యార్థి ఆమె హిజాబ్ ను లాగి పడేసి, ఆమె జుత్తును వెనుక నుంచి పట్టి లాగాడు. దీనిపై విద్యార్థిని తల్లిదండ్రులు కౌన్సిల్ ఆఫ్ అమెరికన్ ఇస్లామిక్ రిలేషన్స్ కు ఫిర్యాదు చేశారు. ఆ కౌన్సిల్ అమెరికన్ ముస్లింల సమస్యలు తీర్చేందుకు ఏర్పాటు చేసింది.

కౌన్సిల్ సంబంధిత స్కూలు ఆ ఘటనకు బాధ్యత వహించి వివరణ ఇవ్వాలని కోరింది. ఘటన జరిగిన తరువాత కూడా స్కూలు ఏమాత్రం స్పందించలేదని కౌన్సిల్ ఆరోపించింది. వారిలాగే ఉంటే భవిష్యత్తులో ముస్లిం విద్యార్థులపై మరిన్ని దాడులు జరిగే అవకాశం ఉందని తెలిపింది. నగర అధికార యంత్రాంగం కూడా ఘటనపై విచారణ జరుపుతున్నట్టు తెలిపింది.

అమెరికాలో హిజాబ్ ధరించిన మహిళలకు ఎక్కువగానే బెదిరింపులు ఎదురవుతున్నాయి. కొన్ని రోజుల క్రితం మిచిగాన్ యూనివర్సిటీకి చెందిన ఓ ముస్లిం యువతిపై ఓ గుర్తు తెలియని వ్యక్తి దాడి చేశాడు. ఆమె తన హిజాబ్ తొలగించకపోతే సజీవ దహనం చేస్తానని బెదిరించాడు. జార్జియాలో ఓ హైస్కూల్లో ముస్లిం టీచర్ కు గుర్తు తెలియని వ్యక్తులు బెదిరింపు లేఖ రాశారు. నీ హిజాబ్ తో ఉరేసుకుని చావు అని లేఖలో రాశారు.