‘నా భార్యకు ఏడుగురు భర్తలు’

తన భార్యకు ఇది వరకే ఏడు పెళ్లిల్లు జరిగాయని, ఆ విషయాన్ని తనకు తెలియకుండా దాచిపెట్టి మోసం చేసిందని పోలీసులకు ఫిర్యాదు చేశాడో వ్యక్తి. అంతేకాకుండా తనపై దాడికి కూడా పాల్పడిందని ఫిర్యాదులో పేర్కొన్నాడు. వివరాల్లోకి వెళ్తే.. తూర్పు బెంగళూరులోని కేజీ హల్లి ప్రాంతానికి చెందిన ఇమ్రాన్ తన భార్య యాస్మిన్ భాను (38) తనపై దాడిచేసిందని ఆరోపిస్తూ పోలీసులను ఆశ్రయించాడు. తన భార్య మోసాలు చేయడానికి అలవాటు పడిందని పోలీసులకు వెళ్లడించాడు. ఈ విషయంపై నిలదీసినందుకు తనపై విచక్షణా రహితంగా దాడిచేసిందని పోలీసుల వద్ద తన గోడు వెల్లబుచ్చుకున్నాడు. పోలీసులు కేసు నమోదు చేసి దర్యాప్తు చేస్తున్నారు.
మరోవైపు యాస్మిన్ తమను గతంలో పెళ్లి చేసుకుందని షోయబ్, అఫ్జల్ అనే ఇద్దరు వ్యక్తులు పోలీసులకు ఫిర్యాదు చేశారు. తన వద్ద యాస్మిన్ పెద్ద మొత్తంలో డబ్బు తీసుకుని పరారైందని రియల్ ఎస్టేట్ ఏజెంట్ అయిన అఫ్జల్ పోలీసులకు ఇచ్చిన ఫిర్యాదులో పేర్కొన్నాడు.