కిడ్నీలు దానమిచ్చుకున్న హిందూ ముస్లిం

భిన్నత్వంలో ఏకత్వం మన దేశం గొప్పతనం. పలుమతాలు, సంస్కృతుల నేపథ్యం గల ప్రజలు ఈ దేశాన్ని మాతృదేశంగా చేసుకుని భారతీయులమైన తామంతా ఒక్కటే అని గర్వంగా చెప్పుకుంటూ జీవిస్తున్నారు. స్వార్థ శక్తులు కులాలు, మతాల పేరుతో దేశ ప్రజల మధ్య ఎన్ని రకాల చిచ్చులు పెట్టినా వారి ఐక్యత చెక్కుచెదరదని గతంలో పలు ఘటనలు నిరూపించాయి. మనదేశ పౌరుల మతసహనానికి, శాంతి సౌభ్రాతృత్వాలకు ఉదాహరణగా ఇటీవల మరో ఒక సంఘటన జరిగింది. నాగపూర్లోని ఒక హిందూ, ముస్లిం కుటుంబం ఒకదానికి ఒకటి కిడ్నీలను దానం ఇచ్చుకుని శెభాష్ అనిపించుకున్నాయి. నాగపూర్లోని ఆసుపత్రిలో ఒకే వార్డులో ఒక హిందూ కుటుంబం, మరో ముస్లిం కుటుంబానికి చెందిన వ్యక్తులు కిడ్నీలు పాడయిపోయి చాలాకాలంగా చికిత్స పొందుతున్నారు. వారి కిడ్నీలు తొలగించాల్సిన పరిస్థితి రావడంతో వేరొకరి నుండి కిడ్నీలను దానంగా స్వీకరించి వారికి అమర్చాల్సిన పరిస్థితి ఏర్పడింది. ముస్లిం కుటుంబంలోని సభ్యులు, హిందూ కుటుంబంలోని సభ్యులు తమ తమ వాళ్లకు కిడ్నీలను దానం ఇచ్చేందుకు ముందుకువచ్చినా వారి కిడ్నీలు ఆ పేషెంట్లకు సరిపోవని వైద్య పరీక్షల్లో తేలింది. దాంతో వైద్యులు ఈ విషయాన్ని ఆ రెండు కుటుంబాల వారికి చెప్పారు. అనంతరం వైద్యులకు ఒక ఆలోచన వచ్చింది. ఒకవేళ ముస్లిం కుటుంబానికి చెందిన వ్యక్తుల కిడ్నీలు హిందూ వ్యక్తికి, అలాగే, హిందూ వ్యక్తి కుటుంబీకుల కిడ్నీలు ముస్లిం పేషెంటుకు సరిపోతాయేమో పరీక్షిద్దామనుకున్నారు. వెంటనే వారు ఈ సంగతిని రెండు కుటుంబాలకు తెలియచేయడంతో వారు వెంటనే ఒప్పుకున్నారు. అదృష్టవశాత్తు ముస్లిం పేషెంట్ భార్య కిడ్నీ హిందూ పేషెంటుకు, అలాగే హిందూ పేషెంట్ తండ్రి కిడ్నీ ముస్లిం పేషెంటుకు సరిపోవడంతో వైద్యులు విజయవంతంగా వారి కిడ్నీల మార్పిడి పూర్తిచేసారు.