రూ.99కే స్మార్ట్ ఫోన్ (జోక్ కాదు నిజమేనట)

251 రూపాయలకే స్మార్ట్ ఫోన్ ఇస్తామంటూ ఫ్రీడమ్ మొబైల్ కలకలం రేపిన సంగతి మర్చిపోకముందే స్మార్ట్ ఫోన్ ను 99 రూపాయలకే ఇస్తామంటూ మరో సంస్థ ముందుకు వచ్చింది. నమోటెల్‌ డాట్‌కామ్‌ సంస్థ 99 రూపాయలకే ‘నమోటెల్‌అచ్చేదిన్’ పేరిట స్మార్ట్‌ఫోన్‌ను పంపిణీ చేస్తామని ప్రకటించింది. మంగళవారం నమోటెల్‌ కంపెనీ సీఈఓ మాధవరెడ్డి బెంగుళూరులో వివరాలు ప్రకటించారు. తమ స్మార్ట్ ఫోన్ 4 ఇంచిల డిస్ ప్లే, 480×800 WVGA రిజల్యూషన్ , ఆండ్రాయిడ్ 5.1 లాలీపప్ ఓఎస్, 1 జీబీ ర్యామ్ , 4 జీబీ ఇంటర్నల్ స్టోరేజ్ , 32 జీబీ ఎక్స్ ప్యాండబుల్ స్టోరేజ్ , మైక్రో ఎస్ డీ కార్డ్ , 2.0 మెగా పిక్సెల్ బ్యాక్ కెమెరా, VGA సెల్ఫీ కెమెరా, 3G సౌకర్యం, డ్యూయల్ సిమ్ సౌకర్యం ఉంటాయన్నారు.

ఈ స్మార్ట్‌ఫోన్‌ కావలసిన వారు బి మై బ్యాంకర్‌ డాట్‌కామ్‌లో రిజిస్ట్రేషన్ చేసుకుని ఐడి, పాస్‌వర్డ్‌ను పొందాలన్నారు. ఇందులో లాగిన్ అయ్యాక ఆన్‌లైన్ రూపంలో నగదు చెల్లించాలి. లైఫ్ టైమ్ మెంబర్ షిప్ కింద 199 రూపాయలు కూడా చెల్లించాలి. ఆ తర్వాత బీఎంబీ రెఫరెన్స్ ఐడి అందుతుంది. వాటి ఆధారంగా నమోటెల్‌ డాట్‌ వెబ్‌సైట్‌లో రిజిస్ట్రేషన్ చేసుకుని ఫోటో, ఆధార్‌కార్డును జతచేస్తే స్మార్ట్‌ఫోన్‌ను సరఫరా చేస్తామన్నారు. బి మై బ్యాంకర్‌లో సభ్యుడిగా చేరితే మాత్రమే నోవాటెల్‌లో రిజిస్ట్రేషన్ సాధ్యమన్నారు. ఫోన్ బుకింగ్స్ మొదలయ్యాయని namotel.comలో ఈ నెల 25 వరకు బుకింగ్ చేసుకోవచ్చని తెలిపారు. మెంబర్ షిప్ ఫీజుకు, రిజిష్టర్ చేసుకుంటే ఫోన్ వస్తుందన్న దానికి గ్యారంటీ ఏమిటని విలేకరులు అడగగా ఆయన సమాధానం దాటవేశారు.