ప్రాణం నిలిపిన సోషల్ మీడియా!

ముంబయికి చెందిన 25 ఏళ్ల రుషి క్యాన్సర్‌తో బాధపడుతున్నాడు. ఇందుకు దాదాపు ఎనిమిది కిమోథెరఫీలు ఇవ్వాల్సి ఉంది. అయితే, తన ఆదాయం అంతంత మాత్రమే కావడంతో చికిత్స చేయించుకోలేని పరిస్థితి ఏర్పడింది. ప్రతి కిమోథెరఫీకి రూ.2.5 లక్షలు చొప్పున చెల్లించాల్సి ఉంది. చికిత్సకు దాదాపు రూ.25 లక్షలు అవసరం. అంత డబ్బు చెల్లించలేక రుషి చికిత్సను మధ్యలోనే ఆపేశాడు. ఈ విషయాన్ని ‘హ్యుమన్స్ ఆఫ్ బొంబై’ ఫేస్‌బుక్ పేజీ ద్వారా పంచుకున్నాడు. చివరిలో తనకు ఆర్థిక సాయం చేసేందుకు ఫండ్ రైజర్ లింక్ కూడా పెట్టాడు. అతడి వైద్యానికి సంబంధించిన వివరాలు, ఆధారాలు అందులో జత చేశాడు. అతడి ఆవేదన అర్థం చేసుకున్న సోషల్ మీడియా యూజర్లు... వెంటనే స్పందించారు. కేవలం ఒక్క రోజులోనే రూ.25 లక్షలు దానం చేసి తమ దాతృత్వం చాటుకున్నారు.




(గమనిక: సోషల్ మీడియాలో ఆర్థిక సహాయంపై వచ్చే కథనాలను పూర్తిగా పరిశీలించిన తర్వాతే సాయం చేయండి. వీలైతే బాధితుడి వివరాలు, ఫోన్ నెంబర్లు, అతడు చికిత్స పొందుతున్న ఆసుపత్రి వివరాలను కూడా సేకరించి, వాస్తవం అని నమ్మిన తర్వాతే సాయం చేయగలరు)