లంచం ఇవ్వలేదని దాడి..ఆపై మృతి

లంచం ఇవ్వలేదని అప్పుడే ఓ బిడ్డను ప్రసవించిన బాలింతను హాస్పిటల్ అటెండెంట్ నెట్టడంతో ఆమె మరణించింది. ఈ దుర్ఘటన కోల్‌కతాలోని ఆర్జే కార్ మెడికల్ కాలేజీలో చోటు చేసుకుంది. దీంతో వైద్య కళాశాల ముందు రోగుల బంధువులతోపాటు మరికొంత మంది ధర్నాకు దిగారు. ఆస్పత్రి సిబ్బంది పాల్పడుతున్న దోపీడిపై చర్యలు తీసుకోవాలని డిమాండ్ చేశారు. ఆస్పత్రిలో ప్రతీ పనికీ అదనంగా డబ్బులు వసూలు చేస్తున్నారంటూ చనిపోయిన మహిళ రేష్మీ బీబీ బంధువులు ఆరోపించారు. అక్కడ జరుగుతున్న దందాల వ్యవహారంపై పశ్చిమ్ బంగ రాష్ట్ర వైద్య విద్య డైరెక్టర్ సుషాంత్ బంధోపాధ్యాయ హాస్పిటల్ సూపరింటిండెంట్‌ను వివరణ కోరారు.
దేగంగాలోని చౌక్ దౌలత్‌కు చెందిన ​ రేష్మీ బీబీ అనే మహిళ ఆదివారం ఉదయం ఆర్జీ‌కే మెడికల్ కాలేజీలో శిశువును ప్రసవించింది. తర్వాత నర్సింగ్ సిబ్బంది ఆమెను వార్డులోని బెడ్‌కు షిఫ్ట్ చేశారు. అప్పుడు ఆమెతోపాటు భర్త హబీబర్ లాస్కర్ కూడా ఉన్నాడు. నర్సింగ్ స్టాఫ్‌లోని ఒకరు రూ.1,000 ఇవ్వాలని అతడిని డిమాండ్ చేశారు. అయితే హబీబర్ రూ.125 ఇచ్చాడు. ఆమె వాటిని తీసుకోకుండా ఈ బాధ్యతను అటెండెంట్‌కు అప్పగించింది. ఆ తర్వాత హబీబర్‌తో ఆమె వాగ్వాదానికి దిగింది. ఈ సమయంలో రేష్మా మధ్యలో కలుగజేసుకుంటే అటెండెంట్ ఆమెను నెట్టడంతో కింద పడిపోయిందని హబీబర్ బంధువు మాసూమ్ గుల్జార్ ఆరోపించారు.
రేష్మాకు అనారోగ్యంగా ఉంది రమ్మంటూ హబీబర్ తమకు ఫోన్ చేశాడు. కానీ అక్కడకు చేరుకునే సమయానికి ఆమె మరణించిందని మసూద్ అన్నారు. అటెండెండ్ నెట్టడంతో కింద పడి స్పృహ‌ కోల్పోయిన రేష్మాను ఎవరూ పట్టించుకోలేదని ఆయన అన్నాడు. దీనిపై రేష్మా బంధువులు గైనకాలజీ డిపార్ట్‌మెంట్ దగ్గర ఆందోళనకు దిగారు. వీరికి ఇతర పేషెంట్ల బంధువులు కూడా మద్దతు తెలిపారు. తర్వాత వీరందరూ హాస్పిటల్ రోడ్డును దిగ్బంధించారు.