ఆ పోలీస్ స్టేషన్ కథే వేరు

అదో వెరైటీ పోలీస్ స్టేషన్. మామూలు పోలీస్ స్టేషన్లకు భిన్నమైన వాతావరణం దానిది. అక్కడ కేసులు ఉండవు. సెల్ దొంగల్లేక వెలవెల బోతూ ఉంటుంది. మరొక చెప్పుకోవాల్సిన విషయమేంటంటే... 23 ఏళ్లలో స్టేషన్ల పరిధిలో ఒక్క రేప్ కేసు కూడా లేదు. ఈ పోలీస్ స్టేషన్ రాజస్థాన్ లోని జై సల్మేర్ లో ఉంది. పాకిస్థాన్ కు 150 కి.మీ దూరంలో ఉంది. ఈ స్టేషన్లో చివరి సారి 1993లో ఓ రేప్ కేసు నమోదైంది. తరువాత మరి లేవు. అసలు చిన్న చిన్ని చిల్లర దొంగతనాల కేసులు పెద్దగా నమోదవ్వవు. అంతేకాదు ఆ స్టేషన్లో ఆడవాళ్లకు, మగవాళ్లకు వేరేవేరేగా సెల్ కట్టారు. అందులో ఒక్క నిందితుడిని కూడా పెట్టాల్సిన అవసరం రాలేదు. ఆ ఊరు దాదాపు 9,600 చదరపు కిలోమీటర్ల విస్తీర్ణంలో ఉంది. ఉండే జనాభా 900 మంది. జనాభా చాలా తక్కువ కావడంతో ఎలాంటి గొడవలు లేకుండా... ప్రశాంతంగా జీవిస్తున్నారు. అంతేకాదు ఆ ఊరికి ఇప్పటికీ కరెంటు లేదు. కనుక చీకటి పడితే చాలు అందరూ నిద్రలోకి జారుకుంటారు. ఒక్క మనిషి కూడా బయట తిరగడు. ఇక్కడ ఆరుగురు పోలీసులు పనిచేస్తున్నారు. వారికి ఉదయం నుంచి సాయంత్రం వరకు ఏం పని ఉండదు. కనీసం ఆ ఊరి నుంచి బయటికి వెళ్లడం కూడా చాలా కష్టం. ఎలాంటి రవాణా సౌకర్యం లేదు. కనుక కొత్త వారు ఆ ఊరికి రాలేరన్న మాట. తప్పు చేసిన పోలీసులకి పనిష్మెంట్ గా ఈ స్టేషన్ కు వేస్తుంటారు. ఇక్కడ పోలీస్ స్టేషన్ ను 1993లో కట్టారు. ఆ ఊళ్లో ఇప్పటికీ ఇదొక్కడే భవనం. మిగతావన్నీ గుడిసెలే. స్టేషన్ కట్టినప్పటి నుంచి ఇప్పటివరకు మొత్తం 55 కేసులు నమోదయ్యాయి. అన్ని కూడా చోటా కేసులే.