అద్వానీ అంటే అంత చులకనా!

భారతీయ జనతా పార్టీ సీనియర్ నేత, కురువృద్ధుడు ఎల్.కె. అద్వానీ అంటే కర్నాటక రాష్ట్ర బీజేపీ నేతలకు అంత చులకనా.. ఆయన వస్తున్నారని తెలిసి కనీసం ఎయిర్‌పోర్టులో స్వాగతం పలకలేనంత బిజీగా ఉన్నారా రాష్ట్ర నేతలు.. ఇక్కడ పరిస్థితి చూస్తే అవుననక తప్పదు మరి. ఒకప్పుడు కేంద్ర రాజకీయాల్లో చక్రం తిప్పిన ఈ సీనియర్ నేతకు నేడు ఆ పార్టీలో ఆదరణ కరువయ్యిందనే చెప్పాలి.
హిందుస్థాన్ ఏరోనాటిక్స్ లిమిటెడ్‌ను సందర్శించడానికి శుక్రవారం అద్వానీ బెంగళూరు వచ్చారు. అయితే ఆయనకి స్వాగతం పలకడానికి మాజీ మంత్రి, ప్రస్తుత ఎమ్మెల్సీ రామచంద్ర గౌడ మాత్రమే ఎయిర్‌పోర్టుకు వచ్చారు. శాసనసభ్యులు ఎస్. సురేశ్ కుమార్, సీటీ రవి, ఎంపీ మోహన్‌ను రాష్ట్ర బీజేపీ అధ్యక్షుడు యడ్యూరప్ప పంపినప్పటికీ వారు అద్వానీ వచ్చిన చాలా సేపటికి గాని విమానాశ్రయానికి రాలేదు.
అద్వానీ బెంగళూరుకు వచ్చారని చాలా టీవీ ఛానళ్లలో వచ్చిన బ్రేకింగ్ న్యూస్‌ని చూసి చాలా మంది నాయకులు హోటల్‌‌లో ఉన్న అద్వానీని కలిశారు. వీరిలో కేంద్ర మంత్రి సదానంద గౌడ కూడా ఉండటం గమనార్హం. నైతికపై నియమించిన పార్లమెంటరీ కమిటీకి చైర్మన్‌గా ఉన్న అద్వానీకి కర్నాటక బీజేపీ నేతలు ఇచ్చే గౌరవమిదేనా.