మెట్రో స్టేషన్లో పోర్న్ వీడియోల ప్రసారం

న్యూఢిల్లీ: అది దేశ రాజధాని నగరంలోని రాజీవ్ చౌక్ మెట్రో స్టేషన్. ప్రయాణికులంతా బిజీగా ఉన్నారు. ప్లాట్‌ఫాం మీద ఉన్న ఎల్‌ఈడీ టీవీల్లో ప్రకటనలు వస్తున్నాయి. కానీ ఆకస్మికంగా ఆ టీవీల్లో పోర్న్ వీడియోలు ప్రసారమయ్యాయి. ఈ దృశ్యాలను చూసి కొందరు నివ్వెరపోగా.. మరి కొందరు మాత్రం తమ ఫోన్లలో రికార్డు చేసి సోషల్ మీడియాలో అప్‌లోడ్ చేశారు. ఈ షాకింగ్ ఘటనతో ఖంగుతున్న ఢిల్లీ మెట్రో రైల్ కార్పొరేషన్ అధికారులు.. విచారణ జరపనున్నట్లు తెలిపారు.

ఆన్‌లైన్‌లో షేర్ అవుతున్న వీడియో అసలైందో కాదో తెలుసుకునే ప్రయత్నం చేస్తామని, నిజమని తేలితే బాధ్యులపై కఠిన చర్యలు తీసుకుంటామని ఢిల్లీ మెట్రో రైల్ కార్పొరేషన్ అధికార ప్రతినిధి తెలిపారు. పోర్న్ వీడియాలు మెట్రో స్టేషన్‌లోని ప్లాట్‌ఫాంపై ఉన్న టీవీల్లో ప్రసారమైన ఘటనకు సంబంధించిన వీడియోలు ఇప్పుడు సోషల్ మీడియాలో హల్‌చల్ చేస్తున్నాయి. అశ్లీల దృశ్యాలు ఏప్రిల్ 9న ప్రసారమైనట్లు తెలుస్తోంది.


2015లో కేరళలో ఇలాంటి ఘటనే వెలుగు చూసింది. వాయంద్ బస్ స్టేషన్లో ప్రయాణికులు బస్సుల కోసం ఎదురు చూస్తుండగా.. సడెన్‌గా పోర్న్ వీడియోలో ప్రసారమయ్యాయి. దీంతో అక్కడి మహిళలు, పిల్లలు అక్కడి నుంచి వెళ్లిపోయారు. టీవీ ప్రసారాలు కనిపించకుండా ఉండేందుకు కొందరు వాటికి పేపర్లు, వస్త్రాలను అడ్డుపెట్టారు.