పాఠశాలలోనే ఫేషియల్.. కెమెరాకు చిక్కిన ప్రిన్సిపాల్!

ఆమె ఓ ప్రభుత్వ ప్రైమరీ పాఠశాలకు ప్రిన్సిపాల్.. అసలే బాధ్యతలు ఎక్కువగా ఉన్న ఉద్యోగం కదా.. అస్సలు విరామం చిక్కట్లేనట్టుంది. దీంతో స్కూల్లోనే ఫేషియల్ చేయించుకున్నారు. బ్యుటీషియన్‌కు కాస్త ఎక్కువ డబ్బులిచ్చి పాఠశాలకే రప్పించుకున్నారు. అంతవరకూ బాగానే ఉంది.. కానీ, ఆమె పిల్లలకు పాఠాలు చెప్పడం మానేసి ఏకంగా తరగతి గదిలోనే ఫేషియల్ చేయించుకుంటున్న ఉదంతాన్ని కొంత మంది వీడియో తీశారు. వీడియో తీస్తున్న విషయం గమనించినా.. ఆమె ఏం చేసుకుంటారో చేసుకోండి అన్నట్టు తన పని తాను కానిచ్చారు. ఆ వీడియో కాస్త సోషల్ మీడియాలో పెట్టడంతో వైరల్‌గా మారింది.

విషయం తెలుసుకున్న విద్యార్థుల తల్లిదండ్రులు, మీడియా.. ఫేషియల్ ఉదంతంపై ఆ ప్రధానోపాధ్యాయురాలిని ప్రశ్నించగా.. ఆ వీడియోలో ఉన్నది తాను కాదని కొట్టి పారేశారు. గిట్టనివాళ్లేవరో తనను అభాసుపాలు చేయడానికి అసత్య ప్రచారం చేస్తున్నారని ఎదురుదాడికి దిగారు. అధికారులు ఏం చేస్తారో మరి.. వేచి చూడాలి! అన్నట్టూ.. ఈ ఉదంతం ఉత్తరప్రదేశ్‌లోని గోరఖ్‌పూర్ సమీపంలో శివ్‌పూర్ ప్రాంతంలో చోటు చేసుకుంది.