మిస్ ఇండియా 2016గా ప్రియదర్శిని చటర్జీ

ఎఫ్.బి.బి. ఫెమీనా మిస్ ఇండియా 2016 కిరీటాన్ని ప్రియదర్శిని చటర్జీ గెలుచుకుంది.

ఎఫ్.బి.బి. ఫెమీనా మిస్ ఇండియా 2016 కిరీటాన్ని ప్రియదర్శిని చటర్జీ గెలుచుకుంది. శనివారం రాత్రి ముంబయిలోని యశ్‌రాజ్ స్టూడియోస్‌లో అంగరంగ వైభవంగా మిస్ ఇండియా పోటీల గ్రాండ్ ఫినాలే జరిగింది. పలువురు బాలీవుడ్ తారలు, జాతీయ, అంతర్జాతీయ అందాల ప్రపంచ ప్రతినిధుల సమక్షంలో పోటీల విజేతలను ప్రకటించారు. మిస్ ఇండియా 2016గా ప్రియదర్శిని చటర్జీనీ న్యాయనిర్ణేతల జ్యూరీ ఎన్నుకోగా తొలి రన్నరప్‌గా శృతి కృష్ణ, రెండో రన్నరప్‌గా పంఖూరీ గిద్వానీలు నిలిచారు.

Samayam Telugu

ఈ పోటీల న్యాయనిర్ణేతలుగా పలువురు ఫ్యాషన్, ఫిల్మ్ ఇండస్ట్రీ ప్రముఖులు వ్యవహరించారు. బాలీవుడ్ నటుడు సంజయ్ దత్, డిజైనర్ మనీశ్ మల్హోత్రా, యంగ్ బాలీవుడ్ హీరో అర్జున్ కపూర్, డైరెక్టర్ కబీర్ ఖాన్, అందాల నటి యామీ జాక్సన్, మిస్ వరల్డ్ 2015 మిరియా లాలాగుణ, టెన్నిస్ క్రీడాకారిణి సానియామీర్జా, ఏక్తాకపూర్, డిజైనర్ షేన్ పీకాక్ తదితరులు వ్యవహరించారు. అందంతో పాటు సదరు ముద్దుగుమ్మల ప్రతిభ, తెలివితేటలు లాంటి వివిధ అంశాల ఆధారంగా న్యాయనిర్ణేతలు విజేతలను ఎంపిక చేసారు.

ఇదిలా ఉండగా ఈ పోటీల్లో ప్రతీ అంకాన్ని కన్నుల పండువగా తీర్చిదిద్దేందుకు నిర్వాహకులు జాగ్రత్తలు తీసుకున్నారు. బాలీవుడ్ యువహీరో వరుణ్ ధావన్, సెలబ్రిటీ సింగర్ రాపర్ బాద్షా, షాహిద్ కపూర్, హీరోయిన్ జాక్విలిన్ ఫెర్నాండెజ్, సింగర్ సునిధి చౌహాన్, టైగర్ ష్రాఫ్ లు తమ ప్రదర్శనలతో ఆహుతులను అలరించారు. మిస్ ఇండియా 2016 విజేత ప్రియదర్శిని చటర్జీ త్వరలో జరిగే ప్రపంచ సుందరి పోటీలకు భారతదేశం తరఫున ప్రాతినిథ్యం వహించనుంది.