చికెన్ తింటా.. ఒక వారం సెలవివ్వండి!

సాధారణంగా లీవ్ లెటర్ రాసేప్పుడు ఆరోగ్యం బాగోలేదనో, బంధువుల ఫంక్షన్‌కు హాజరవ్వాలనో లేదా ఎవరైనా పోయారనో కారణాలు రాస్తుంటారు. అయితే, చత్తీస్‌గడ్‌లోని బిలాస్‌పూర్‌ జిల్లా దీప్కా ప్రాంతానికి చెందిన పంకజ్ రాజ్ అనే రైల్వే ఉద్యోగి చికెన్ తినడం కోసం వారం రోజులు సెలవు అడిగి వార్తల్లోకి ఎక్కాడు. ఇదేదో సరదాకు రాసిన లీవ్ లెటర్ అనుకుంటే పొరపాటే. చికెన్ ఎందుకు తినాలని అనుకుంటున్నాడో కూడా వివరంగా రాశాడు. ఈ లీవ్ లెటర్‌పై దీప్కా స్టేషన్ మాస్టర్ అధికారిక స్టాంప్ కూడా ఉంది.

హిందీలో రాసిన ఈ లేఖ సారాంశంలోకి వెళితే.. ‘‘శ్రావణ మాసం (ఏటా వర్షాకాలంలో హిందువులు పాటించే పవిత్ర మాసం) మేం మాంసాహారం ముట్టుకోం. ఆ నెలంతా శాఖాహారమే తింటాం. ఇప్పుడు ఆ నెల ముగిసింది. పనిచేసేందుకు శక్తి కావాలంటే చికెన్ తినాలి. కావున జూన్ 20 నుంచి 27వ తేదీ వరకు నాకు సెలవు ఇవ్వాల్సిందిగా కోరుతున్నాను’’ అని పంకజ్ రాజ్ లెటర్‌లో పేర్కొన్నాడు. అయితే, దీన్ని స్టేషన్ మాస్టర్ ఆమోదించారో లేదో తెలియరాలేదు. లెటర్ మాత్రం సోషల్ మీడియాలో చక్కర్లు కొడుతూ వైరల్‌గా మారింది.