రేపిస్టు బాబా రెడ్ బ్యాగ్ వ్యూహమిదే..!

రేపిస్టు బాబా ‘గుర్మీత్‌ రామ్ రహీం సింగ్‌’ను సీబీఐ కోర్టు దోషిగా తేల్చగానే.. పంచకులలో అతడి అనుచరులు చెలరేగిపోయి విధ్వంసానికి పాల్పడ్డ విషయం తెలిసిందే. అయితే.. అల్లర్ల నేపథ్యంలో కోర్టు తీర్పును చాలాసేపటి వరకు గోప్యంగా ఉంచినప్పటికీ.. గుర్మీత్‌కు శిక్ష పడిన సంగతి బయటకు ఎలా పొక్కింది? తీర్పు దృష్ట్యా పంచకులలో ఇంటర్నెట్‌, మొబైల్‌, విద్యుత్ సేవలను నిలిపేసినా డేరా అనుచరులు ఆ విషయం ఎలా తెలుసుకున్నారు. ఇప్పటివరకూ అంతు చిక్కని ఈ ప్రశ్నకు హర్యాణా పోలీసులు సమాధానం ఇచ్చారు. వీటన్నింటికీ కారణం డేరా బాబా చేతిలోని ఓ ఎర్ర బ్యాగే కారణమట.

‘పంచకుల సీబీఐ కోర్టులో తీర్పు వెలువడగానే గుర్మీత్‌ను కోర్టు బయటకు తీసుకొచ్చాం. వెలుపలికి రాగానే గుర్మీత్‌ తన ఎర్ర బ్యాగును ఇవ్వాలంటూ పదే పదే కోరాడు. సిర్సా నుంచి తనతో పాటు తెచ్చుకున్న ఆ బ్యాగులో తన దుస్తులున్నాయని చెప్పాడు. అయితే.. తనను దోషిగా తేల్చారని తన అనుచరులకు సంకేతమివ్వడానికే అతడు ఆ బ్యాగు పట్టుకున్నాడు’ అని పోలీసులు వివరించారు. అప్పటికే అతడి తరఫు లాయర్ కూడా ఆ బ్యాగ్‌ను పట్టుకొని కోర్టు కారిడార్‌లో అటూ ఇటూ తిరుగుతూ సంకేతాలిచ్చాడట.

‘గుర్మీత్‌ కారు నుంచి బ్యాగ్‌ను బయటకు తీసిన వెంటనే.. కొద్ది దూరంలో పేలుడు శబ్దాలు వినిపించాయి. దీంతో బ్యాగుతో గుర్మీత్‌ తన అనుచరులకు సంకేతాలు ఇచ్చినట్లు అర్థమైంది’ అని ఐజీ కేకే రావు తెలిపారు. అంతేకాకుండా కోర్టు నుంచి బయటకు వచ్చాక గుర్మీత్‌‌ను పోలీసు వాహనంలో తరలించడానికి తీసుకెళుతుండగా.. కాస్త నెమ్మదించాడట. చేతిలోని ఎర్ర బ్యాగును అందరికీ కనిపించేలా పట్టుకొని నడిచాడట. దీంతో తన అనుచరులు విషయం తెలుసుకొని అల్లర్లు సృష్టించి తనను అక్కడి నుంచి తప్పిస్తారని బాబా ముందుగానే వ్యూహం పన్నాడట.

‘ఈ విషయాన్ని మేం తొందరగానే గ్రహించాం. వెంటనే జాగ్రత్తపడ్డాం. గుర్మీత్‌ను తక్షణమే అక్కడి నుంచి రోహ్‌తక్‌ జైలుకు తరలించడానికి ప్రత్యేక హెలికాప్టర్‌ ఏర్పాటు చేశాం. కానీ.. ఇదే సమయంలో మళ్లీ ఓ సమస్య వచ్చింది. హెలిపాడ్‌కు తీసుకెళ్లే దారిలో గుర్మీత్ అనుచరులు 70 వాహనాల్లో వేచి ఉన్నారు. దీంతో ప్రమాదాన్ని ఊహించి.. వెంటనే మార్గాన్ని మార్చాం. ఆర్మీ నుంచి అనుమతి తీసుకొని కంటోన్మెంట్‌ మీదుగా అతణ్ని హెలిప్యాడ్‌ వద్దకు తీసుకెళ్లాం’ అని ఐజీ తెలిపారు.


Soon after Gurmeet Ram Rahim Singh was declared guilty by CBI Court in Panchkula on August 25, Rapist Baba demanded a 'red bag' that he had brought from Sirsa, the main base of his Dera Sacha Sauda sect.