ఇక 3జీ ఫోన్లలోనూ పని చేయనున్న జియో!

రిలయన్స్ జియో సిమ్ 4జీ నెట్‌వర్క్‌పైనే పని చేస్తున్న సంగతి తెలిసిందే. అందుకు తగ్గట్టుగా 4జీని సపోర్ట్ చేసే ఫోన్‌లోనే జియో సిమ్ పని చేస్తుంది. 3జీ ఫోన్ వాడుతూ.. జియో సిమ్ వాడలేకపోతున్నామని చాలా మంది బాధపడుతుంటారు. అలాంటి వారికి శుభవార్త. 3జీ కస్టమర్లు కూడా జియో సిమ్‌ను వాడేందుకు అవకాశం కలగబోతుందని వార్తలు వెలువడుతున్నాయి. ఇందుకోసం ఈ నెల చివరిలోగా రిలయన్స్ ఒక యాప్‌ను విడుదల చేయబోతోందట. జనవరి 1 నుంచి రిలయన్స్ జియో హ్యాపీ న్యూఇయర్ ఆఫర్లో భాగంగా 3జీ కస్టమర్లకు ఈ అవకాశం కలగనుందనేది ఆ వార్తల సారంశం.

వచ్చే ఏడాది మర్చి వరకు వెల్‌కమ్ ఆఫర్‌ను పొడిగిస్తున్నట్లు రిలయన్స్ ఇండస్ట్రీస్ అధినేత ముకేశ్ అంబానీ ఇటీవలే ప్రకటించిన సంగతి తెలిసిందే. సెప్టెంబర్ 4న జియో సేవలను అధికారికంగా ప్రారంభించగా.. ఇప్పటికే 52 మిలియన్ల మంది కస్టమర్లుగా చేరారు. మరింత మందిని ఆకర్షించడం కోసం జియో ఉచిత ఆఫర్‌ను మార్చి వరకూ పొడిగించారు. ఒకవేళ 3జీ కస్టమర్ల కోసం జియో యాప్ రూపొందిస్తోన్న వార్తలు నిజమైతే.. జియో కస్టమర్ల సంఖ్య భారీగా పెరిగే అవకాశం ఉంది.