ఈ నేరగాళ్ల మారుపేర్లు.. కాసేపు నవ్వుకోడానికే!

సాధారణంగా నేరగాళ్లకు వింతవింత పేర్లు ఉంటాయి. పోలీసులను తప్పుదోవ పట్టించడంతో పాటు ప్రజల్లో భయభ్రాంతులు కలిగించడానికి వాళ్లు తమ అసలు పేర్లకు బదులుగా వెరైటీ పేర్లను ప్రాచుర్యంలోకి తీసుకొస్తారు. ముంబైకి చెందిన చోటారాజన్ నుంచి హైదరాబాద్‌కు చెందిన నయీం వరకు అందరిదీ ఇదే బాట. అయితే.. బెంగళూరు సిటీలో క్రిమినళ్ల పేర్లు మరింత వింతగా ఉన్నాయి.. ఆ నగరానికి చెందిన నేరగాళ్ల మారు పేర్లపై ప్రముఖ ఆంగ్ల పత్రిక ‘టైమ్స్ ఆఫ్ ఇండియా’లో ఆసక్తికర కథనం ప్రచురితమైంది. ఈ పేర్ల వెనక రకరకాల నేపథ్యాలు ఉన్నాయి. ఆ పేర్ల గురించి చెబితే.. దడ పుడుతుందో లేదో.. తెలీదు గానీ, నవ్వు మాత్రం కచ్చితంగా ఆపుకోలేరు.

సెక్సీ గూండా, పాయిజన్ రామా, అల్యూమినియం బాబు, గాలి రవి, మళయా ప్రవీణ్, జాకీ, డాబర్, సైకిల్ రవి, బేకరీ రఘు, కేబుల్ శ్రీ‌ధర, బ్రేక్ జాగీ.. ఇవన్నీ బెంగళూరు నగరం, దాని శివారు ప్రాంతాల్లో హడలెత్తిస్తున్న నేరగాళ్ల పేర్లు. రమేశ్ అనే నేరస్థుడు విష ప్రయోగం ద్వారా చాలా మందిని హత్య చేయడం వల్ల అతడికి ‘పాయిజన్ రామా’ పేరు స్థిరపడింది. గాలి రవి.. చూడ్డానికి బక్క పలచగా.. గట్టిగా గాలి వీస్తే కొట్టుకుపోయేలా ఉంటాడు. అందువల్ల అతడికి ఆ పేరు స్థిర పడింది. ఇక అల్యూమినియం బాబు అలియాస్ సురేశ్.. గతంలో అల్యూమినియం వ్యాపారం చేసేవాడు.

నరసింహమూర్తి అనే క్రిమినల్ గతంలో డాబర్ మ్యాన్ శునకాలను బ్రీడింగ్ చేసి అమ్మేవాడు. నేర ప్రవృత్తిలోకి దిగాక అతడు.. ‘డాబర్’ పేరుతో ప్రజలను భయానికి గురి చేశాడు. ఇక సైకిల్ రవికి.. గతంలో సైకిల్ రిపేర్ షాపు ఉండేది. మళయా ప్రవీణ్.. కేరళ నుంచి బెంగళూరుకు వలస వచ్చాడు. ఇలా చెప్పుకుంటూ పోతే ఒక్కొక్కరిదీ ఒక్కో నేపథ్యం అన్నమాట.

సెక్సీ గూండాకు ఆ పేరు ఎలా.. వచ్చి ఉంటుందో ఊహించగలరా..! ఏమీ లేదు.. అతడి డ్రెస్సింగ్ విధానం అలా ఉంటుందన్నమాట. ఓ రౌడీగాడు తన స్కూలు జీవితంలో.. ఇండిపెండెన్స్ డే, రిపబ్లిక్ డే సందర్భంగా తరచూ ‘గాంధీజీ’ వేశం కట్టేవాడట. అందువల్ల అతడికి విచిత్రంగా ‘గాంధీ’ పేరు స్థిరపడింది. నాగరాజు అనే కార్పొరేటర్ గతంలో తనకు స్థిరపడిన ‘బాంబ్ నాగా’ పేరును తొలగించుకోవడానికి నానా పాట్లు పడుతుండటం కొసమెరుపు. ఒకే నగరంలో నేరగాళ్లకు ఇన్ని వెరైటీ పేర్లు ఉండటంతో.. బెంగళూరువాసులు విస్తూ పోతున్నారు.


సాధారణంగా.. వాళ్ల పుట్టు పూర్వోత్తరాలు, నేరాల స్వభావం, గతంలో నిర్వహించిన వృత్తులు, నేర సంఘటనలు తదితరాల ఆధారంగా నేరస్థులకు ఇలాంటి పేర్లు స్థిరపడతాయి. పోలీసులు కూడా ఈ రౌడీగాళ్లను.. వాళ్ల అసలు పేరుతో కాకుండా ‘నిక్ నేమ్స్‌’తోనే ఎక్కువగా సంబోధిస్తుంటారు. దీనికి కారణం.. ఆ మారు పేర్ల ద్వారానే ప్రజలకు వారి గురించి సులభంగా అవగాహన కల్పించవచ్చన్నమాట!