రేఖకి సంజయ్‌తో పెళ్లయిందా ? ఇందులో నిజం ఎంత ?

డల్‌గా సాగిపోతోందనుకుంటున్న సండే వార్తా ప్రపంచంలోకి ఉన్నట్టుండి దూసుకొచ్చిన ఓ బ్రేకింగ్ న్యూస్ ఇంటర్నెట్‌ని, సోషల్ మీడియాను షేక్ చేసింది. అదేమంటే... ప్రముఖ బాలీవుడ్ నటి రేఖకు సంజయ్ దత్‌తో పెళ్లయిందని, ఆమె అతడినే భర్తగా భావిస్తూ తిలకం పెట్టుకుంటోందనేది ఆ వార్తా కథనాల సారాంశం. యాసర్ ఉస్మాన్ రాస్తున్న రేఖ ఆటో బయోగ్రఫీ 'రేఖ-ద అన్ టోల్డ్ స్టోరీ'లో ఈ విషయాన్ని ప్రస్తావించినట్టుగా పలు వార్తాసంస్థలు ఊటంకించాయి.

ఇదే విషయమై తాజాగా యాసర్ ఉస్మాన్‌తో మాట్లాడిన హిందుస్థాన్ టైమ్స్ అసలు విషయాన్ని రాబట్టినట్టు తెలుస్తోంది. హిందుస్థాన్ టైమ్స్ ప్రచురించిన ఓ కథనం ప్రకారం.. సంజయ్ దత్‌తో రేఖకి వివాహం జరిగిందనే ప్రచారంలో వాస్తవం లేదని యాసర్ ఉస్మాన్ స్పష్టంచేసినట్టు సమాచారం. ఉస్మాన్ రాస్తున్న రేఖ ఆటోబయోగ్రఫీలో ఎప్పటిలాగే ఆమెకి వివిధ బాలీవుడ్, వ్యాపార ప్రముఖులతో సంబంధాలున్నట్టుగా ముడిపెడుతూ వచ్చిన రూమర్లు ప్రస్తావించే క్రమంలోనే సంజయ్ దత్ పేరు ప్రస్తావనకి వచ్చిందే తప్ప అతడితో ఆమెకి వివాహమైందనే పుకార్లలో నిజం లేదు. 1984లో వచ్చిన 'జమీన్ ఆస్మాన్' అనే సినిమా చిత్రీకరణ సమయంలో సంజయ్- రేఖల మధ్య ఏర్పడిన చనువు ఈ పుకార్లకి కారణమైంది. అయితే రేఖతో తనకి పెళ్లయిందనే వార్తలపై గతంలోనే సంజయ్ దత్ వివరణ ఇచ్చుకుని వుండటం వల్ల కూడా ఈ వార్తకి అంత ప్రాధాన్యత వచ్చి వుండవచ్చని ఉస్మాన్ అభిప్రాయపడ్డారు.