అవును.. సరస్వతి నది నిజంగానే ఉంది: నిపుణుల కమిటి

సరస్వతి నది ఉందా, లేక అది పుక్కిట పురాణమా అని ఎన్నో చర్చలు జరిగాయి. ఇక వాటికి ముగింపు పలకాల్సిన తరుణం వచ్చింది. ఇప్పటి వరకు పురాణాల్లోనే ప్రస్థావించిన సరస్వతి నది నిజంగానే భారత ఉపఖండంలో ప్రవహించినట్లు సాధికారిక ఆధారాలు దొరికాయి. నది ఉనికికి సంబంధించిన నిజానిజాలను కనుగొనేందుకు ప్రభుత్వ కమిటీ ఒకటి ఈ మేరకు ఒక నిర్ధారణకు వచ్చింది. సరస్వతి నది నిజంగానే ఉందని కేంద్ర జలవనరుల శాఖకు నివేదిక సమర్పించింది. హిమాలయాల్లో పుట్టిన సరస్వతి హర్యానా, రాజస్థాన్, ఉత్తర గుజరాత్ రాష్ట్రాల మీదుగా ప్రవహించేది. నది పొడవు మొత్తం నాలుగు వేల కిలోమీటర్లు కాగా, అందులో మూడు వేల కిలోమీటర్ల నదీ పరివాహక ప్రాంతం మనదేశంలోనే ఉంది. మిగిలిన నది పరివాహక ప్రాంతం మన దాయాది పాకిస్థాన్లో ఉంది.


కమిటీని నేతృత్వం వహించిన భూగర్భ శాస్త్రవేత్త ప్రొఫెసర్ వాల్దీయా మాట్లాడుతూ తమ పరిశోధన వివరాల గురించి ఆసక్తికరమైన విషయాలను వెల్లడించారు. ఈ మేరకు ఆయన తమ నివేదికను కేంద్ర జలవనరుల శాఖ మంత్రి ఉమాభారతికి అందచేసారు. ఈ పరిశోధన వివరాల గురించి ఉమాభారతి మాట్లాడుతూ నదిని పునరుజ్జీవింపచేసేందుకు తగు చర్యలు తీసుకునేందుకు చర్యలు తీసుకుంటామన్నారు. పరిశోధన ఫలితాలను ప్రభుత్వం తక్కువ అంచనా వేసి చూడలేదని, కమిటీ చెప్పింది నిజమేనని తన వ్యక్తిగత అభిప్రాయమన్నారు.