శక్తిమాన్ వ్యవహారం కోహ్లీని కూడా బాధించింది

పోలీస్ గుర్రం శక్తిమాన్‌పై దాడి ఘటనపై భారత క్రికెటర్ విరాట్ కోహ్లీ కూడా స్పందించాడు. ఆ ఘటనపై తన ఆవేదనను వ్యక్తం చేశాడు. ఉత్తరాఖండ్ రాష్ట్రప్రభుత్వానికి వ్యతిరేకంగా ప్రతిపక్షం బీజేపీ ఈ నెల 14వ తేదీన డెహ్రాడూన్లో నిర్వహించిన ఆందోళన కార్యక్రమంలో పాల్గొన్న ఆ పార్టీ ఎమ్మెల్యే గణేశ్ జోషి శక్తిమాన్‌పై అమానుషంగా తన ప్రతాపాన్ని చూపి కాలు విరిగేలా హింసించిన సంగతి తెలిసిందే. ఎమ్మెల్యే పుణ్యమా అంటూ ఆ గుర్రం తన కాలును పోగొట్టుకుని అవిటిదైపోయింది. ఈ సంఘటనపై దేశవ్యాప్తంగా ప్రజల నుండి ఆవేదన వ్యక్తమైంది. విరాట్ కోహ్లీ కూడా ఈ ఘటన తనను అమితంగా బాధించిందని ట్వీట్ చేశాడు. ఆ అందమైన, సాధు జంతువుపై దాడి చేయడాన్ని మించిన దారుణం ఏమైనా ఉందా అని ప్రశ్నించాడు. ఆ చర్యను ఒక పిరికిపంద చర్యగా వ్యాఖ్యానించాడు. శక్తిమాన్ త్వరగా కోలుకోవాలని ఆకాంక్షిస్తూ భగవానుడిని ప్రార్థిస్తున్నానన్నాడు. సదరు ఎమ్మెల్యేపై కఠిన చర్యలు తీసుకుంటారని భావిస్తున్నానని ట్వీట్లో పేర్కొన్నాడు.