రిలయన్స్ జియో బిల్లులొస్తున్నాయంట?!

ఫ్రీయే కదా అని రిలయెన్స్ జియో సిమ్మును వీరకుమ్ముడు కుమ్మేస్తూ వాడేస్తున్నవారికి ఇది షాకింగ్... 4జి ఇంటర్నెట్, వాయిస్ కాల్స్, మెసేజీలు... అన్నీ మీకు ఫ్రీ.. ఫ్రీ... ఫ్రీ అంటూ ముఖేశ్ అంబానీ రిలయన్స్ సంస్థ తీసుకువచ్చిన జియో సిమ్ కోసం ప్రజలు ఎగబడ్డారు. సిమ్ముల కోసం లైన్లలో తోసుకున్నారు. పోలీస్ కేసులు కూడా పెట్టుకున్న సంగతి తెలిసిందే. డిసెంబర్ నెలాఖరు వరకు వాడుకున్న వారికి వాడుకున్నంత ఉచితం అని చెప్పిన రిలయన్స్ సంస్థ ఇప్పుడు తన వినియోగదారులకు బిల్లులు పంపించడం ప్రారంభించిందని సోషల్ మీడియాలో ప్రచారం జరుగుతోంది. ఇందుకు ఆధారంగా తనకు వచ్చిన జియో బిల్లును కూడా ఒక నెటిజన్ పోస్ట్ కూడా చేశాడు. అందులో అతగాడికి ఏకంగా రూ.28వేల వరకు బిల్లు పడింది.

ఇది చూసి బెంబేలెత్తిన సదరు కస్టమర్ జర జాగ్రత్త అంటూ నెట్లో విషయాన్ని చెప్పాడు. దీన్ని చూసిన వారి గుండెలు గుబేల్ మన్నాయి. ఎక్కడ తమకు కూడా బిల్లులు వస్తాయోనని చెమట్లు తుడుచుకుంటున్నారు. ఆధార్ ఆధారిత కెవైసీ విధానంలో కస్టమర్ల నుండి వేలిముద్రలు కూడా ముందుగానే పగడ్బందీగా తీసుకోవడంతో బిల్లులు కట్టకుండా తప్పించుకునే అవకాశం లేదని కొందరు అంటున్నారు.

సోషల్ మీడియాలో ఇంత ఎత్తున ప్రచారం జరుగుతున్నా రిలయన్స్ సంస్థ దీనిపై స్పందించలేదు.