హైదరాబాద్ హోటల్‌లో ఆమెకు నో ఎంట్రీ!

ఒంటరి మహిళలకు హైదరాబాద్ హోటల్ లో రూంలు దొరకవా? సింగిల్ కు వచ్చే పర్యాటకులకు హైదరాబాద్ హోటళ్లలో గదులు అద్దెకు ఇవ్వరా? సింగపూర్ నుంచి హైదరాబాద్ వచ్చిన ఓ పర్యాటకురాలుకు ఓ హోటల్ అద్దెకు రూం ఇవ్వకపోవడం గమనిస్తే అవుననే అనిపిస్తోంది.

సింగపూర్ కు చెందిన ఆర్టిస్ట్ 22ఏళ్ల నుపుర్ సరస్వత్ ఇండియా టూర్ లో భాగంగా శనివారం హైదరాబాద్ వచ్చారు. ట్రావెల్, హోటల్, ఇతర ఆన్ లైన్ బుకింగ్ పోర్టర్ www.goibibo.com ద్వారా ఓ హోటల్ లో గది అడిగితే ‘సింగిల్ విమెన్’ (ఒంటరి మహిళలు)కు హోటల్ లో రూంలు లేవని సదరు హోటల్ (దక్కన్-ఎర్రగడ్డ) యాజమాన్యం చెప్పినట్లు సరస్వత్ ఫేస్ బుక్ లో కామెంట్ పోస్టు చేశారు. ‘ఒంటరి మహిళలు హోటల్ లో కంటే వీధుల్లో ఉంటేనే బాగుంటుందేమోనని ఆ హోటల్ యాజమాన్యం నిర్ణయించినట్లుంది’ అని సరస్వత్ కామెంట్ సోషల్ మీడియాలో వైరల్ గా మారింది.


ఒక హోటల్ ఒంటరిగా వచ్చే మహిళా పర్యాటకులకు గదులను నిరాకరించే హోటల్ ను తొలిసారిగా చూస్తున్నానని... చెప్పిన సరస్వత్.. రాత్రి 11 గంటల తర్వాత మహిళలు వస్తే.. అప్పుడు హోటల్ లో గదులు లేవంటే.. వారి పరిస్థితి ఏంటనీ ప్రశ్నిస్తున్నారు.

అంతేకాదు హోటల్ లో రూం కావాలంటే జెండర్ అడగటం ఏంటనీ ఆమె మండిపడుతున్నారు. సింగిల్ విమెన్ కు రూం ఇవ్వొద్దన్నది తమ ఫాలసీ అని హోటల్ చెబుతున్నదని ఆమె వివరించారు. హోటల్ లో రూం కావాలంటే మగవారి తోడు తప్పదా అంటూ ఆవేదన వ్యక్తం చేశారు.