6 నెలలు అక్కర్లేదు, అప్పటికప్పుడే విడాకులు!

హిందూ విడాకుల చట్టం విషయంలో సుప్రీం కోర్టు ఆసక్తికరమైన వ్యాఖ్యలు చేసింది. చట్టంలోని కొన్ని సెక్షన్లను ప్రస్తావిస్తూ, వాటిని కచ్చితంగా పాటించాల్సిన అవసరం లేదని స్పష్టం చేసింది. ఇన్నేళ్లుగా విడాకుల విషయంలో ఉన్న ఆరు నెలల విరామ సమయాన్ని పాటించవచ్చు, పాటించకపోవచ్చు.. అని సుప్రీం కోర్టు స్పష్టం చేసింది. విడాకులు మంజూరు చేయడానికి కచ్చితంగా ఆరు నెలల వ్యవధిని పాటించాల్సిన అవసరం మాత్రం లేదని వ్యాఖ్యానిస్తూ, దిగువ కోర్టులకు సూచన చేసింది సర్వోన్నత న్యాయస్థానం.

చట్టం ప్రకారం.. విడాకులు కోరుతూ ఏ జంట అయినా పిటిషన్ దాఖలు చేస్తే, వాళ్లిద్దరూ ఉమ్మడి అంగీకారం తెలిపినప్పటికీ విడాకుల మంజూరుకు ఆరు నెలల విరామం ఉండాలి. విడాకుల చట్టం సెక్షన్ 13బీ(2)లో ఈ నియమాన్ని పొందు పరిచారు. అయితే ఇది తప్పనిసరి కాదని, సలహాపూర్వకమే అని సుప్రీం కోర్టు అభిప్రాయపడింది. దంపతులు కచ్చితంగా విడిపోవాలని నిర్ణయించుకున్నాకా, వాళ్లిద్దరూ మళ్లీ కలవడానికి ఆసక్తితో లేరని న్యాయస్థానం భావిస్తే ఆరు నెలల విరామం అక్కర్లేకుండా అప్పటికిప్పుడే విడాకులు మంజూరు చేయవచ్చని న్యాయస్థానం వ్యాఖ్యానించింది.

తాము ఎనిమిది సంవత్సరాలుగా విడివిడిగా ఉంటున్నామని, తమకు విరామ సమయం అక్కర్లేకుండా విడాకులు మంజూరు చేయాలని ఒక జంట దాఖలు చేసిన విడాకుల పిటిషన్ పై స్పందిస్తూ కోర్టు ఈ వ్యాఖ్యానాలు చేసింది.