బళ్లారిలో భయపెడుతున్న 'వాట్సాప్' పోస్టు!

బళ్లారిలో ఒక వాట్సాప్ మెసేజ్ ప్రజలను భయాందోళనలకు గురిచేస్తోంది. పిల్లలను ఎత్తుకెళ్లడానికి పార్థిగ్యాంగ్‌తోపాటు, ఇతర గ్యాంగులు గ్రామాల్లోకి ప్రవేశించాయని, మరికొన్ని గ్యాంగులు దొంగతనాలకు పాల్పడుతున్నాయని వాట్సాప్‌లో ప్రచారం సాగుతోంది. కొంతమంది గుర్తుతెలియని వ్యక్తుల ఫోటోలను వాట్స్‌ప్‌లో ఉంచి, వీరంతా పార్థి గ్యాంగ్‌ మనుషులని, వీరిని ఎక్కడైనా గుర్తిస్తే వెంటనే పట్టుకొని పోలీసులకు అప్పగించాలంటూ ఉన్న వాట్సాప్ మెసేజ్ హల్‌చల్ చేస్తోంది. దీంతో ప్రజలు చేతుల్లో కర్రలు, కొడవళ్లు పట్టుకొని రాత్రంతా గ్రామంలో తిరుగుతూ పహారా కాస్తున్నారు.

అయితే పోలీసులు మాత్రం అలాంటిదేమీ లేదని అంటున్నారు. ఇలాంటి గ్యాంగ్‌ ఏదీ లేదని, ఇలాంటివాటిని నమ్మి ప్రజలు భయబ్రాంతులకు గురవుతున్నారని, ఆధారాలు లేకుండా వాట్సప్‌లో ఉంచితే చర్యలు తప్పవని అంటున్నారు. బళ్లారితో పాటు చుట్టుపక్కల గ్రామాల్లోనూ.. ఎలాంటి గ్యాంగ్‌లు తిరగడంలేదన్నారు. తమకు ఇంతవరకు ఎలాంటి ఫిర్యాదులు కూడా ఇంతవరకు అందలేదని చెబుతున్నారు.

ఇలాంటి మెసేజ్‌లను ఫార్వర్డ్ చేసేవారిపై చట్టరీత్యా చర్యలు తప్పవని పోలీసులు హెచ్చరిస్తున్నారు. వదంతులను నమ్మొద్దని, రాత్రివేళల్లో గ్రామాల్లో పహారా వద్దన్నారు. పిచ్చివారిని ఫోటోలుతీసి కొంతమంది ఆకతాయిలు వాట్స్‌ప్‌లో ఇలాంటి పోస్టులు పెడుతూ.. ప్రజలను భయభ్రాంతులను చేస్తున్నారని పోలీసులు తెలిపారు.