పెళ్లికి నిరాకరించిన ప్రియుడిపై యాసిడ్ దాడి!!

బాయ్‌ ఫ్రెండ్ తనను పెళ్లి చేసుకోడానికి నిరాకరించాడని ఓ యువతి అతడిపై యాసిడ్ దాడి చేసింది. ఈ ఘటన బెంగళూరులో చోటు చేసుకుంది. ఓ ప్రైవేట్ హాస్పిటల్‌లో నర్స్‌గా పనిచేస్తున్న 26 ఏళ్ల లిదియా ఫైసిబా అనే మహిళ మాజీ ప్రేమికుడిపై యాసిడ్‌తో దాడి చేసి గాయ పరచింది. ప్రకాశ్‌నగర్‌‌కు చెందిన 32 ఏళ్ల జయకుమార్ వస్త్రాల వ్యాపారం నిర్వహిస్తుంటాడు. శ్రీరామపురకు చెందిన లిదియా ఫైసిబాతో జయకుమార్‌కు 2011లో పరిచయం ఏర్పడింది. ఈ పరిచయం కాస్తా ప్రేమకు దారితీసింది.

అయితే భేదాభిప్రాయాలతో గతేడాది అక్టోబరులో ఇద్దరూ విడిపోయారు. గతంలో తనను తప్ప వేరే మహిళను వివాహం చేసుకోనని జయకుమార్ ప్రమాణం చేశాడని ఆమె పోలీసులకు తెలిపింది. కానీ వివాహం తర్వాత తనను మతం మారాలంటూ బలవంతం చేయడంతో ఆమెతో బంధం తెంచుకున్నానని జయకుమార్ తెలిపాడు. ఇద్దరూ శేహాద్రిపురంలోని ఓ ప్రైవేట్ పాఠశాలలో విద్యాభ్యాసం పూర్తిచేసినట్లు పోలీసులు తెలిపారు.

జయకుమార్ మతం మారితే తప్ప తమ కూతురితో వివాహానికి అంగీకరించమని లిదియా తల్లిదండ్రులు అభ్యంతరం వ్యక్తం చేసినట్లు పోలీసులు పేర్కొన్నారు. దీంతో జయకుమార్ ఆమెతో బంధానికి స్వస్తి చెప్పాడు. కొన్ని నెలల తర్వాత జయకుమార్‌ కుటుంబం పెళ్లి సంబంధాలు వెదుకుతున్నారని తెలుసుకున్న లిదియా అతడిని కలవడానికి ప్రయత్నించింది. కానీ జయకుమార్ అందుకు నిరాకరించాడు. దీంతో కక్ష పెంచుకున్న లిదియా అతడిపై యాసిడ్‌తో దాడి చేయాలని నిర్ణయించింది.

విజయనగర్ పైప్‌లైన్ రోడ్డులోని ఆలయానికి జయకుమార్ ప్రతి సోమవారం వెళుతుంటాడు. ఈ విషయం తెలిసిన లిదియా తన సోదరుడు సునిల్ కుమార్‌తో కలిసి కారులో అక్కడకు వెళ్లింది. సాయంత్రం 5 గంటలకు జయకుమార్‌, మరో వ్యక్తితో కలిసి ద్విచక్ర వాహనంపై అక్కడకు చేరుకున్నాడు. ఇదే అవకాశంగా భావించిన లిదియా అతడిని సర్జికల్ బ్లేడ్‌తో గాయపరిచి తర్వాత యాసిడ్ దాడి చేసి పారిపోయింది. గాయపడిన జయకుమార్‌ను హాస్పిటల్‌కు తరలించారు. ఆయనకు ఎలాంటి ప్రాణాపాయం లేదని వైద్యులు తెలిపారు. ఆమెపై పోలీసులు కేసు నమోదు చేసి అదుపులోకి తీసుకున్నారు.