ట్రాఫిక్ జామ్‌ నరకం.. ఊపిరాడక వ్యక్తి మృతి

ఊపిరి సలపనివ్వని ట్రాఫిక్ జామ్ ఓ నిండు ప్రాణాన్ని బలి తీసుకుంది. ఉత్తరాఖండ్‌లోని నైనిటాల్‌లో ఈ విషాదం చోటు చేసుకుంది. ముక్తేశ్వర్ ప్రాంతానికి చెందిన తారా దత్ జోషి (56) శ్వాస సంబంధ సమస్యతో బాధ పడుతున్నారు. ఆదివారం (అక్టోబర్ 22) జోషికి శ్వాస తీసుకోవడంలో మరింత ఇబ్బంది ఏర్పడటంతో.. కుటుంబ సభ్యులు ఆయణ్ని తీసుకొని ఓ క్యాబ్‌లో హల్ద్వానీలోని ఆసుపత్రికి బయలుదేరారు. కానీ, అదే సమయంలో హల్ద్వానీ - భోవాలి రహదారిపై భారీగా ట్రాఫిక్ జామ్ ఏర్పడింది. ముక్తేశ్వర్ నుంచి హల్ద్వానికి దూరం 16 కిలోమీటర్లు మాత్రమే. మామూలుగానే కాస్త రద్దీగా ఉండే ఆ దారి, దీపావళి పండక్కి సొంత ఇళ్లకు వచ్చిన వారు తిరుగుముఖం పట్టడంతో మరింత రద్దీగా మారింది.

3 గంటల పాటు ట్రాఫిక్‌జామ్‌లోనే ఉండిపోవడంతో.. అసలే శ్వాస తీసుకోవడానికి ఇబ్బంది పడుతున్న జోషి మరింత ఇబ్బందిపడ్డారు. జోషి పడుతున్న ఇబ్బంది చూసి కుటుంబసభ్యులు తల్లడిల్లిపోయారు. ఆయన ప్రాణాలు దక్కించుకోడానికి తీవ్రంగా ప్రయత్నించారు. 100 నంబర్‌కు అనేకమార్లు డయల్ చేసి ట్రాఫిక్‌ను క్లియర్ చేయమని పోలీసులకు మొరపొట్టుకున్నా.. ఫలితం లేకపోయింది. చుట్టూ ఉన్న వాహనదారులు ఆ కుటుంబ వేదనను గమనించినా.. ఏం చేయలేకపోయారు.

మధ్యాహ్నం 12 గంటలకు బయలుదేరిన జోషి కుటుంబం.. ఆసుపత్రికి వెళ్లే సరికి 3.30 అయింది. అక్కడ జోషిని పరీక్షించిన వైద్యులు అప్పటికే ఆయన మృతి చెందినట్లు ధ్రువీకరించారు. కాస్త ముందుగా తీసుకొచ్చి ఉంటే.. ప్రాణాలు దక్కి ఉండేవని తెలిపారు. ట్రాఫిక్ చిక్కుల వల్లే తమ తండ్రిని కోల్పోయామని, ట్రాఫిక్ పోలీసులు నిర్లక్ష్యంగా వ్యవహరించారని జోషి కుమారుడు భాస్కర్ (29) ఆవేదన వ్యక్తం చేశాడు.