ఈ టెన్త్ ఫెయిల్డ్ సక్సెస్ స్టోరీ విన్నారా?

ఆ యువకుడి పేరు సునీల్ యాదవ్. ఊరు ముంబై. ఇటీవలే ప్రతిష్టాత్మకమైన టాటా సోషల్ సైన్సెస్ సంస్థ నుండి ఎంఫిల్ డిగ్రీ అందుకున్నాడు. ఇందులో వింతేముంది.. బాగా చదివిన ప్రతిభావంతులెవరైనా పట్టాలందుకోవడం సహజమే. కానీ, సునీల్ గురించి తెలిసిన వారు మాత్రం ఔరా అని ముక్కున వేలేసుకోకమానరు. సునీల్ యాదవ్ బృహత్ ముంబై మునిసిపల్ కార్పొరేషన్లో పారిశుద్ధ్య కార్మికుడు. అంతేకాదు ఈ ఎంఫిల్ డిగ్రీ విజేత ఒకప్పుడు టెన్త్ ఫెయిల్ అంటే నమ్ముతారా? కానీ ఇది నిజం. పదవ తరగతి తప్పి వేరే ఉద్యోగావకాశాలు లేక బతకడానికి పారిశుధ్యకార్మికుడి పనిలో చేరాడు. మనసులోమాత్రం అతనిలో పదవతరగతి పరీక్షలో తప్పిన బాధ ఉంది. రోజురోజుకు అది పెరిగిందే కానీ తగ్గలేదు. ఆ పరీక్షకు మళ్లీ హాజరై ఉత్తీర్ణత సాధించేందుకు తగిన ఆర్థిక స్తోమత లేదు. సాయపడేవారు కూడా వెనక ఎవరూ లేరు.

చివరకు సునీల్ ఒక రోజు తన భవిష్యత్తు కోసం మనసులో సంకల్పం చెప్పుకున్నాడు. పదవ తరగతి ఫెయిలైన తాను ఎలాగైనా ఉన్నత విద్య చదివి జీవితంలో ఎప్పటికైనా పైకి ఎదిగితీరతానని ప్రతిన బూనాడు. ఈ తరహా ప్రతినలు సినిమాల్లో అయితే హీరోలకు చాలా సులువు. కానీ ఈ రియల్ లైఫ్ హీరోకు మాత్రం అది కచ్చితంగా కష్టమే. తన సంకల్పానికి ఎన్ని ఆటంకాలు ఎదురైనా అతనిలోని పట్టుదల మాత్రం పోలేదు. ఒకవైపు పారిశుద్యకార్మికునిగా పని చేస్తూనే మరోవైపు పదవ తరగతి పరీక్షలకు మళ్లీ హాజరయ్యాడు. కష్టపడి చదివి ఉత్తీర్ణత సాధించాడు. దాంతో తనపై తనకు నమ్మకం ఏర్పడింది. అలా పనిచేస్తూనే బీకామ్ పూర్తి చేసాడు. ఆ తరువాత బీఎ జర్నలిజం చేసాడు. అంతటితో ఆగలేదు. సోషల్ వర్క్ లో డిప్లొమా, ఆ తరువాత దానిలోనే మాస్టర్స్ చేసాడు. అనంతరం గ్లోబలైజేషన్, లేబర్ చట్టాలపై ఎంఎ చేసాడు. వాటితో అతని డిగ్రీల సంఖ్య ఆరుకు చేరింది. అనంతరం అతని దృష్టి ఎంఫిల్ డిగ్రీపై పడింది. టాటా సంస్థలో దాన్ని ఇటీవలే అందుకున్నాడు.

మొదట్లో అతను పదవతరగతి తప్పిన వెంటనే ఇక సొంత ఊరులో ఉండలేక బయటకు వచ్చేసాడు. ముంబైలో పారిశుద్ధ్యపనికి కుదిరాడు. దాని వల్ల వచ్చే స్వల్ప వేతనంతో బతకడమే కష్టం. ఇక చదువులకు ఫీజులెలా? అందుకే పార్ట్ టైమ్ అనువాదకుడిగా మారి ఆ వచ్చిన డబ్బుతో ఫీజులు కట్టుకున్నాడు. ఒకవైపు తాను చదువుకుంటూనే మరోవైపు తన భార్యను కూడా చదివేందుకు పురికొల్పాడు. ఫీజులు కట్టుకుంటూ నెలా నెలా కొంత మొత్తం కూడా భవిష్యత్ అవసరాల కోసం వెనకేసాడు. పెళ్లైపోయిన తరువాత ఇక చదువెందుకన్న భార్యను ఒప్పించి ఆమెతో బీఎ పూర్తి చేయించాడు. ఇప్పుడామె న్యాయవిద్యను అభ్యసిస్తోంది.

ఇన్ని డిగ్రీలు సాధించినా సునీల్ లో ఇంకా చదవాలనే తపన పోలేదు. ఇప్పుడు అతని దృష్టి డాక్టరేటుపై పడింది. అమెరికాలో దాన్ని పూర్తిచేయడానికి ప్రయత్నాలు ముమ్మరం చేసాడు. ప్రస్తుతం ఇన్ని డిగ్రీలు చేతిలో ఉన్నప్పటికీ సునీల్ తన పారిశుద్ధ్య కార్మికుని ఉద్యోగాన్ని వదులుకోలేదు. ఇప్పటికీ అందులోనే కొనసాగుతున్నాడు. బాధాకరమైన విషయమేమిటంటే.. సునీల్ ప్రతిభా పాటవాలను అంతా గుర్తించి కొనియాడుతుంటే అతను పనిచేస్తున్న బృహత్ ముంబై మునిసిపల్ కార్పొరేషన్ మాత్రం దాన్ని ఏమాత్రం పట్టించుకున్న పాపాన పోలేదు. అతన్ని కనీసం నోటిమాటగా అయినా ప్రశంసించలేదు. చాలా సంస్థలు సునీల్ లాంటి ఉద్యోగులకు అన్ని రకాలుగా అండదండలనిస్తుంటాయి. వేతనాల్లో కూడా ఇంక్రిమెంట్లు ప్రకటిస్తాయి. కానీ, బీఎంసీ అలా చేయలేదు.

You can also read this story in Marathi: http://maharashtratimes.indiatimes.com/maharashtra/mumbai-news/m-phil-sunil-yadav/articleshow/52135852.cms