జయలలితకు ‘సైకత’ నివాళి

తమిళనాడు ముఖ్యమంత్రి జయలలితకు ప్రముఖ సైకత శిల్పి సుదర్శన్ పట్నాయక్ ‘సైకత’ నివాళి అర్పించారు. ఈ మేరకు పూరీ తీరంలో ఆమె సైకత శిల్పాన్ని నిర్మించారు. ఒడిశాకు చెందిన సుదర్శన్ పట్నాయక్ గతంలోనూ అబ్దుల్ కలాం వంటి గొప్ప నాయకులకు సైకత శిల్పాలతో నివాళులర్పించారు.

కాగా, జయలలిత అంత్యక్రియలు మంగళవారం సాయంత్రం చెన్నైలో ముగిసాయి. కేంద్ర ప్రభుత్వ లాంఛనాలతో అమ్మ అంత్యక్రియలు జరిగాయి. మెరీనా బీచ్‌ వద్ద ఉన్న దివంగత ఎంజీ రామచంద్రన్ సమాధి పక్కనే జయలలితను ఖననం చేశారు. కొంతకాలంగా అపోలో ఆసుపత్రిలో చికిత్స పొందిన పురచ్చి తలైవి సోమవారం రాత్రి తుదిశ్వాస విడిచిన సంగతి తెలిసిందే.