పై నుంచి దూకిన భార్య.. జుట్టందుకుని కాపాడిన భర్త

భర్తతో గొడ‌వ‌పడిన ఓ మ‌హిళ ఏడంత‌స్థుల భవనంపై నుంచి దూకి ఆత్మహత్యకు ప్రయత్నించింది. దీన్ని గమనించిన భర్త ఆ మహిళ దూకిన వెంట‌నే చేతికి ఆమె జుట్టును అందబుచ్చుకుని దాని సాయంతోనే ఆమెను పైకి లాగాడు. నరాలు తెగిపడే ఈ ఘటన చైనాలోని షాంగ్జీలో చోటుచేసుకుంది. భవంతిలోని ఏడో అంతస్తుపై ఉన్న వారిని రక్షించేందుకు అక్కడికి చేరుకున్న పోలీసులు సైతం ఈ ఘ‌ట‌న‌తో కంగారు పడ్డారు.

కాంగ్‌, లీయూ అనే దంపతులు షాంగ్జీలో ఓ భవనంలోని ఏడో అంతస్తులో నివ‌సిస్తున్నారు. భర్తతో గొడపడి ఒత్తిడికి గురైన కాంగ్‌ ఆత్మహత్యకు ప్రయత్నించింది. ఈ ప్రయత్నంలో భవంతిపై నుంచి దూకేందుకు పరుగెత్తగా లీయూ కూడా ఆమెను అనుసరించాడు. ఆమె బిల్డింగ్ పై నుంచి దూక‌గానే అనూహ్యంగా భర్త చేతికి ఆమె జుట్టు దొరికింది.

అయితే తనను వ‌దిలేయాల‌ని, చ‌నిపోతాన‌ని భ‌ర్త‌ను వేడుకొంది. లీయూ ఆమెను పైకి లాగే ప్రయత్నం చేశాడు. పోలీసులు కూడా అక్కడకు చేరుకుని ఆ జంటను రక్షించేందుకు తమ వంతు సాయం చేశారు. సుమారు అరగంటపాటు జరిగిన ఈ ఘ‌ట‌నను చుట్టుపక్కల వాళ్లు ఊపిరిబిగబట్టి చూశారు. ఈ ప్ర‌య‌త్నంలో ఓ పోలీసు భుజానికి గాయాలయ్యాయి. మనిషి జుట్టుకు సుమారు 12 టన్నుల బరువును ఆపగలిగే సామ‌ర్థ్యం ఉంటుందట.