ప్రమాద బాధితులను ఆస్పత్రిలో చేర్పిస్తే నజరానా!!

రోడ్డు ప్రమాదాల్లో గాయపడిన క్షతగాత్రులను ప్రాణాపాయం నుంచి కాపాడటానికి ఢిల్లీ ప్రభుత్వం ఓ విన్నూత్న పథకాన్ని ప్రారంభించడానికి ముందుకొచ్చింది.
రోడ్డు మీద వెళుతుండా కళ్ల ముందే ఓ ప్రమాదం జరిగితే మనసులో అయ్యో పాపం అనిపించినా అక్కడికి చేరుకుని సాయం చేసేవాళ్లు మనదేశంలో అరుదు. ఈ ఘటన గురించి సమాచారం అందిస్తే పోలీస్ స్టేషన్లు, కోర్టుల చుట్టూ తిరగడమే కాకుండా పోలీసుల నుంచి కూడా వేధింపులు ఎదురవుతాయని భావిస్తారు.

సుమారు 80 శాతం మంది వీటికి భయపడే ప్రమాదాలపై స్పందించకుండా తమ మానాన తాము జారుకుంటారు. ఈ పరిస్థితిలో మార్పు తీసుకొచ్చేందుకు ఢిల్లీ ప్రభుత్వం శ్రీకారం చుట్టింది. ప్రమాదాలు జరిగినప్పుడు బాధితులను ఆస్పత్రిలో చేర్పించేవారికి రూ. 2 వేలను ప్రోత్సాహకంగా ఇస్తామని ప్రకటించింది. ప్రజల్లో సామాజిక సేవా దృక్పథాన్ని కలిగించే ఉద్దేశంతోనే ఈ నిర్ణయం తీసుకున్నట్లు ఆప్ సర్కారు తెలిపింది.

అంతే కాకుండా రివార్డుతోపాటు సాయపడిన వ్యక్తికి ప్రభుత్వం తరఫున ప్రశంసా పత్రాన్ని కూడా అందిస్తామని ఢిల్లీ ఉప ముఖ్యమంత్రి మనీశ్ సిసోడియా వెల్లడించారు. తమ నిర్ణయంతో ప్రజల్లో చైతన్యం వస్తుందని ఆశిస్తున్నామని ఆయన అభిప్రాయపడ్డారు.