బైక్ కొంటే మేక ఫ్రీ: బెడిసికొట్టిన ప్లాన్!

దసరా, దీపావళి పండుగల్లో మోటారు వాహనాలకు మంచి డిమాండు ఉంటుంది. దీన్ని సద్వినియోగం చేసుకునేందుకు వ్యాపారులు రకరకాల రాయితీలు, బహుమతులు ప్రకటిస్తారనే సంగతి తెలిసిందే. దీంతో తమిళనాడులోని ఇలియంగుడీ అనే ఓ చిన్న పట్టణంలో గాయత్రీ మోటర్స్‌కు చెందిన డీలర్.. కాస్త డిఫరెంట్‌గా ఉంటుందని, ‘‘మా వద్ద బైక్ కొంటే మేక ఫ్రీగా ఇస్తాం’’ అని ప్రకటించేశాడు.

ఇది కొత్తగా బైకు కొనేవారికే కాకుండా ఎక్స్‌చేంజ్ చేసుకునేవారికి కూడా వర్తిస్తుందని తెలిపాడు. ఇంకేముంది, ఈ ప్రకటనకు విశేష స్పందన లభించింది. ఎంతగా అంటే.. ఇక ఫ్రీగా ఇవ్వడానికి మేకలు కూడా సరిపోనంత. రోజూ బైకులు కొనేవాళ్లు ‘మేక ఇస్తానే కొంటాం.. లేకపోతే వేరే చోటకు వెళ్తాం’ అంటూ.. వ్యాపారిని ముప్పు తిప్పలు పెట్టారు.

డిమాండు బాగా పెరగడంతో చివరికి ఆ వ్యాపారి తన ప్రకటన రద్దు చేశాడు. ఈ ఆఫర్‌ను మధ్యలోనే ఆపేయడానికి ఇంకో కారణం కూడా ఉంది. ఫ్రీగా ఇచ్చేందుకు మేకలు అందుబాటులో ఉన్నా ఒక్కో మేక ధర దాదాపు రూ.3వేలుకు పెరగడంతో.. వాటిని కొనలేక చేతులెత్తేశాడు.