పెళ్లి కార్డు ఇవ్వడానికి వెళ్లి.. అఘాయిత్యం!

ఆ యువతి అతడికి సొంత గ్రామానికే చెందిన పాత స్నేహితురాలు. ఆమెకు ఏడాది కిందటే వివాహమైంది. భర్తతో చక్కగా కాపురం చేసుకుంటోంది. అతగాడికి ఇటీవలే పెళ్లి కుదిరింది. పెళ్లి కార్డు ఇవ్వడానికి ఆ యువతి ఇంటికి వెళ్లాడు. ఆ సమయంలో ఆమె ఇంట్లో ఒంటరిగా ఉంది. తెలిసిన వాడే కదా అని ఆమె అతడిని లోపలికి రానిచ్చింది. ఇదే అదనుగా అతడు ఆమెపై అత్యాచారానికి ప్రయత్నించాడు. రెండు కుటుంబాల్లో చిచ్చు రేపిన ఈ ఊహించని పరిణామం రంగారెడ్డి జిల్లాలో చోటు చేసుకుంది.

శంషాబాద్‌ మండలంలోని ఓ గ్రామానికి చెందిన శ్రీనివాస్‌ అనే యువకుడికి ఇటీవలే పెళ్లి నిశ్చయమైంది. పెళ్లి శుభలేఖలను పంచుతూ.. అతడు తన స్నేహితురాలైన ఓ వివాహిత (23) ఇంటికి వెళ్లాడు. అత్తగారింట్లో ఆమె ఒంటరిగా ఉండటం గమనించి, ఆమెపై అఘాయిత్యానికి ప్రయత్నించాడు. ఆమె గట్టిగా కేకలు వేయడంతో పరారయ్యాడు. బాధితురాలి ఫిర్యాదు మేరకు శంషాబాద్‌ గ్రామీణ పోలీస్ స్టేషన్ సిబ్బంది అతడిపై నిర్భయ కేసు నమోదు చేశారు. దీంతో అతడి వివాహ తంతు సంశయంలో పడింది. అనూహ్యంగా చోటు చేసుకున్న ఈ ఘటనతో ఆ వివాహిత కుటుంబంలోనూ కలతలు రేగాయి. ఆ ప్రబుద్ధుడి ఘనకార్యంతో ఇప్పుడిలా రెండు కుటుంబాల్లో నీలినీడలు కమ్ముకున్నాయి.