అడ్రస్ కావాలంటూ మైనర్‌కు ఫోన్లో పోర్న్ వీడియో...

పుణేలో మహిళలపై అకృత్యాలు ఇప్పట్లో ఆగేలా లేదు. నగరంలో ఏదో ఓ ప్రాంతంలో కీచకులు పంజా విసురుతున్నారు. ఇన్ఫోసిస్ ఉద్యోగిని హత్య, పింప్రీ ప్రాంతంలో ఓ 19 ఏళ్ల యువతిపై అత్యాచారం, మాజీ ప్రియుడి చేతిలో హత్యకు గురైన ఓ మహిళ ఇలా చెప్పుకుంటూ పోతే ఈ నెలలో మహిళలపై అఘాయిత్యాలు చాలానే చోటు చేసుకున్నాయి. ఓ పదిహేనేళ్ల బాలికకు పోర్న్ వీడియో చూపి లైంగిక వేధింపులకు పాల్పడిన సంఘటన తాజాగా వెలుగుచూసింది.

బాధితురాలు సాయంత్రం 5.30 ప్రాంతంలో కోచింగ్ క్లాసులకు వెళ్తుండగా ఓజాస్ సొసైటీ దగ్గర కారులో నుంచి దిగిన ఓ 30 ఏళ్ల వ్యక్తి పషాన్‌కు దారి చెప్పమంటూ అడిగాడు. అడ్రస్ సరిగ్గా పేర్కొంటే డైరెక్షన్స్ ఇస్తానని తెలిపింది. దీంతో నిందితుడు తన మొబైల్ ఫోన్ తీసి అడ్రస్ చూపిస్తానంటూ ఆమెకు పోర్న్ వీడియోలు చూపించాడు. ఈ చర్యలకు షాక్ తిన్న బాలిక అక్కడే కుప్పకూలిపోయింది. పది రోజుల వరకు ఈ ఘటనపై ఎవరితోనూ చెప్పలేదు.

కూతురు పరిస్థితిని గమనించిన ఆమె తండ్రి ఏం జరిగిందో చెప్పమంటూ ప్రశ్నించాడు. దీంతో ఆ బాలిక జరిగిన విషయం తండ్రికి చెప్పింది. ఫిబ్రవరి 15 న ఈ ఘటన చోటు చేసుకుంటే ఫిబ్రవరి 26 న పోలీసులకు ఫిర్యాదు చేశారు. నిందితుడు చర్యలతో షాక్‌కు గురైన ఆ బాలిక తేరుకోడానికి పది రోజులు పట్టిందని తండ్రి పేర్కొన్నట్లు చతుర్‌శృంగి పోలీస్ స్టేషన్ అధికారి వర్ష షిండే తెలిపాడు.

ఫిర్యాదు ఆధారంగా నిందితుడిపై కేసు నమోదు చేసిన పోలీసులు దర్యాప్తు చేపట్టారు. ఆ ప్రాంతంలోని సీసీటీవీ ఫుటేజ్‌‌లను పరిశీలించి నిందితుడి ఆచూకీ కోసం ప్రయత్నిస్తున్నారు. గతంలోనూ ఇలాంటి ఘటనలు చోటు చేసుకున్నట్లు కొంతమంది తల్లిదండ్రులు తెలియజేశారు.