ఆదర్శప్రాయుడు.. ఈ దివ్యాంగుడు

అవయవాలన్నీ బాగున్నా, శరీరం సహకరిస్తున్నా కొంత మంది సోమరితనానికి బానిసలై యాచకులుగా మారుతున్నారు. ఇలాంటి సమాజంలో స్పూర్తిదాయకమైన జీవనాన్ని గడుపుతూ అందరికీ ఆదర్శంగా నిలుస్తున్నాడు ప్రబీర్ పాల్. పశ్చిమ బెంగాల్‌లోని హూగ్లీ జిల్లాలో ఉన్న మిర్గా గ్రామానికి చెందిన ప్రబీర్ పుట్టుకతోనే దివ్యాంగుడు. ఈయన మనలా నిటారుగా నిల్చోలేడు. అలాంటి వ్యక్తి ఎలాంటి లాభాన్ని ఆశించికుండా పేద విద్యార్థులకు పాఠాలు చెప్తున్నాడు. తన ఊరికి 2 కి.మీ. దూరంలో ఉన్న ఛత్ర ప్రాథమిక పాఠశాలకు రోజూ వెళ్లి పిల్లలకు విద్యను భోదిస్తున్నాడు. గత 18 ఏళ్లుగా జీతం తీసుకోకుండా పిల్లలకు పాఠాలు నేర్పిస్తున్నాడు. తన తల్లి పేపర్ కవర్లు తయారుచేసి సంపాదించిన డబ్బుతోనే ఇల్లు గడుస్తోంది. ప్రబీర్ కూడా ప్రైవేట్ ట్యూషన్స్ చెప్తూ తన తల్లికి సాయపడుతున్నాడు.
పిల్లలకు చదువు చెప్పడంతో పాటు వారి కోసం సేంద్రీయ పద్ధతిలో కూరగాయలు కూడా పండిస్తున్నాడు ప్రబీర్. స్కూల్ పక్కన ఉన్న చిన్న ప్రదేశంలో కూరగాయల మొక్కలు పెంచుతున్నాడు. ఈ కూరగాయలను మధ్యాహ్న భోజనానికి ఉపయోగిస్తున్నారు. పాఠశాల పరిశుభ్రంగా ఉంచడంతో పాటు టాయిలెట్లు, పరిసరాలను అతనే స్వయంగా శుభ్రపరుస్తాడు. ఇదంతా ఎందుకు చేస్తున్నావ్? అని అడిగితే.. పిల్లలంటే తనకు ప్రాణమని, వారికి మంచి జీవనాన్ని అందించడానికే తన ప్రయత్నమని ప్రబీర్ చెప్తున్నాడు. ప్రబీర్‌తో పనిచేయడం మాకెంతో గర్వకారణమని మిగిలిన ఉపాధ్యాయులు చెపుతున్నారంటే.. ఆయన గొప్పతనమేంటే అర్థమవుతోంది. ఇలాంటి వారిని చూసైనా మనం మేల్కోవాలి. మన బాధ్యతలను మనం సక్రమంగా నిర్వర్తించి, మెరుగైన జీవనాన్ని పెంపొందించాలి.