పింక్ ఆటో: మహిళల కోసం.. మహిళల చేత!

మహిళల భద్రత కోసం సూరత్ మున్సిపల్ కార్పొరేషన్ (SMC) సరికొత్త ఐడియాతో ముందుకొచ్చింది. కేవలం మహిళల కోసమే ‘పింక్’ ఆటోలను అందుబాటులోకి తెచ్చింది. వీటిని నడిపే బాధ్యత కూడా మహిళలకే కల్పించడం గమనార్హం. మహిళలకు ఉపాధి కల్పించడం కోసం సూరత్ మున్సిపాలిటీ.. మహిళలకు ఆటో డ్రైవింగ్‌లో శిక్షణ ఇవ్వడంతోపాటు, ఆటోలు కొనుగోలుకు బ్యాంకు రుణాలు ఇప్పించింది.

ఇలా 70 మంది మహిళలకు శిక్షణ ఇప్పించగా, తొలి విడతలో 15 మంది విధులు ప్రారంభించారు. ఎస్‌ఎంసీ అసిస్టెంట్ కమిషనర్ గాయత్రి జరివాలా మాట్లాడుతూ.. ‘‘దేశంలో మహిళలపై వేధింపులు పెరుగుతున్న నేపథ్యంలో వారి రక్షణ కోసం పింక్ ఆటోలు నడపాలని నిర్ణయించాం. ఇందుకు బ్యాంకు ఆఫ్ బరోడా ద్వారా రాయితీల కింద ఒక్కొక్కరికి రూ.84వేలు చొప్పున రుణసాయం అందించం’’ అని తెలిపారు. దేశవ్యాప్తంగా ఇలాంటి ‘పింక్ ఆటోలు’ మరిన్ని రావాలని ఆశిద్దాం.