ఎలుక మాంసం కిలో రూ.200.. ఎక్కడో తెలుసా?

నాన్‌వెజ్‌లో చికెన్, మటన్, చేపలకే గిరాకీ ఉంటుందని అనుకుంటే పొరపాటే. ఆ రాష్ట్రంలో ఎలుక మాంసానికి కూడా మాంచి గిరాకీ ఉంది. అందుకే అక్కడ కిలో ఎలుక మాంసం ఏకంగా రూ.200 పలుకుతోంది. దేశంలోని ఈశాన్య రాష్ట్రాల్లో చికెన్, పంది మాంసానికి డిమాండు ఎక్కువగా ఉంటుంది.

అయితే, అస్సాంలోని బక్సా జిల్లాలోని కుమారికటా గ్రామస్తులు మాత్రం ఎలుక మాంసానికే అధిక ప్రాధాన్యమిస్తారు. అది వారి సాంప్రదాయ ఆహారం కావడంతో ఆదివారం వచ్చిందంటే చాలు.. ప్రజలంతా ఎలుక మాంసం కోసం క్యూ కడతారు. బ్రాయిలర్ చికెన్‌తో సమానంగా ఎలుక మాంసం ధరలు ఉంటున్నాయంటే అక్కడ డిమాండు ఏ స్థాయిలో ఉందో అర్థం చేసుకోవచ్చు.

గువహతీకి సుమారు 90 కిమీల దూరంలో ఉన్న ఇండియా-భూటాన్ సరిహద్దుల్లోని గ్రామాల్లో ప్రతి ఆదివారం తాజా ఎలుక మాంసాన్ని విక్రయిస్తారు. వీటి కోసం అస్సాం నలుమూలల నుంచి ప్రజలు ఇక్కడికి తరలివస్తారు. ఎలుక మాంసానికి ఉన్న గిరాకీ వల్ల అక్కడి రైతులు రెండు చేతులా సంపాదిస్తున్నారు. వీరు ఎలుకలను ఎందుకు తింటారనడానికి ప్రత్యేక కారణమైతే ఏదీ లేదు. ఎన్నాళ్ల నుంచో సాంప్రదాయకంగా వస్తున్న వంటకంగా ఎలుకలను ఆరగిస్తున్నారు.

ఎలుకలు రాత్రి వేళల్లో కన్నాల నుంచి బయటకు వస్తాయి. దీంతో రైతులు రాత్రి వేళ్లల్లో కర్రలతో నిర్మించిన బోనులను వ్యవసాయ క్షేత్రాల్లో పెడతారు. బోనులో పడిన ఎలుకలను కొద్ది రోజులు పోషించి, ఆదివారం మార్కెట్లకు తరలిస్తారు. ఎలుకలను పట్టుకోవడం వల్ల ఆదాయమే కాకుండా తమ పంటలను రక్షించుకోగలుగుతున్నాం అని రైతులు చెబుతున్నారు. 10 కిలోల నుంచి 20 కిలోల ఎలుకలను మార్కెట్లో విక్రయించి సొమ్ము చేసుకుంటున్నామని తెలిపారు. అబ్బ.. ఈ బిజినెస్ ఏదో బాగుందే అనుకుంటున్నారా? మన రాష్ట్రాల్లో కూడా ఎలుకలు తినేవారు ఉండాలి కదా!!