చెమటలు పట్టించిన ‘జమున’

ఓ జూలో ఆడపులి తప్పించుకుని సందర్శకులకు, అధికారులకు ముచ్చెమటలు పట్టించింది. మధ్యప్రదేశ్ లోని ఇండోర్‌లో ఉన్న జూకు ఆదివారం వందల మంది సందర్శకులు వచ్చారు. కాగా జమున అనే ఆడపులి ఎన్ క్లోజర్ నుంచి బయటకు వచ్చేసింది. దీంతో భయపడిన జనం పరుగులు పెట్టారు. పులి ఓ మూల దాక్కోవడంతో అది ఎక్కడుందో, ఎవరి మీద దాడి చేస్తుందో తెలియక ప్రజలంతా తీవ్ర ఆందోళనకు గురయ్యారు. చాలా కుటుంబాలను అధికారులు జూ నుంచి బయటికి పంపించారు. అయినా చాలా కుటుంబాలు లోపలే ఉండిపోయాయి.

ఓ వ్యక్తి పులి దాడి నుంచి త్రుటిలో తప్పించుకున్నారు. అధికారులు జమున ఎక్కడుందో వెతకడానికి బృందాలు విడిపోయి జూ మొత్తం తిరిగారు. చివరికి చీకటి పడ్డాక రాత్రి ఏడున్నర సమయంలో పులి బయటికి వచ్చింది. అటవీ శాఖ అధికారులు దానిని చాకచక్యంగా పట్టుకుని తిరిగి ఎన్ క్లోజర్ లోకి పంపించారు. పిల్లలు జమునపై రాళ్లు వేయడం, పెళ్లి బాజా గట్టిగా వినబడడంతోనే జమున డిస్టర్బ్ అయిందని జూ అధికారులు అంటున్నారు.