ప్లాస్టిక్‌ను నిషేదించాలంటూ ఆత్మహత్య

పర్యావరణ పరిరక్షణ కోసం తాను ఏదైనా త్యాగం చేస్తానని ఆ యువకుడు అన్నప్పుడు ఏ ఒక్కరూ ఆలోచించలేదు...ఎన్విరాన్ మెంట్ కోసం ఆ ప్రకృతి ప్రేమికుడు ప్రాణత్యాగం చేస్తాడని...పర్యావరణానికి పెనుముప్పుగా పరిణమించిన ప్లాస్టిక్‌ను నిషేదించాలంటూ తమిళనాడుకు చెందిన ఓ యువకుడు ఆత్మహత్య చేసుకున్నాడు.

తన చావుతోనైనా ప్లాస్టిక్‌ను నిషేదించాలనే ఆలోచన సమాజానికి, ప్రభుత్వానికి వస్తుందని ఆశిస్తున్నట్లు తమిళనాడులోని తాంజవూరుకు చెందిన జవహార్ అనే 23ఏళ్ల యువకుడు నదిలో దూకి ఆత్మహత్య చేసుకున్నాడు. సోమవారం కనిపించకుండా పోయిన జవహార్ బుధవారం నదిలో శవమై తేలాడు.

‘పచ్చని పంట పొలాలను నాశనం చేస్తూ రియల్ ఎస్టేట్, అడ్డూఅదుపులేని పట్టణీకరణ వల్ల పర్యావరరణానికి ఎంతో ముప్పు వాటిల్లుతోందని జవహార్ ఎప్పూడు అంటుండేవాడు. పర్యావరణానికి ముప్పు వాటిల్లకుండా ప్లాస్టిక్‌ వాడకం తగ్గించాలని జవహార్ ప్రచారం నిర్వహించేవాడు’ అని జవహార్ తండ్రి కుమారన్ విలపించాడు.

తాంజవూరులో జవహార్ పలుమార్లు ప్లాస్టిక్ నిషేదం కోసం ధర్నాలు కూడా చేసినట్లు స్థానికులు చెబుతున్నారు. పదోతరగతి వరకు చదువుకున్న జవహార్ పర్యావరణాన్ని అమితంగా ప్రేమించేవాడని, ప్రకృతిని కాపాడితే అది మనల్ని కాపాడుతుందని తరచూ చెబుతుండేవాడని స్థానికులు గుర్తు చేస్తున్నారు.

‘పర్యావరణాన్ని పరిరక్షించేందుకు ప్లాస్టిక్ నిషేదించాలని డిమాండ్ చేస్తూ నేను ఆత్మహత్య చేసుకోవాలని నిర్ణయించుకున్నా. 127కోట్ల జనాభా ఉన్న దేశంలో వారందరి శ్రేయస్సుకోసం నేనొక్కడిని ప్రాణత్యాగం చేయడంలో తప్పులేదు. నా నిర్ణయం వెనకాల ఎవ్వరి ప్రోద్బలం లేదు. ప్రకృతికి విరుద్ధంగా ఏ ఒక్కరూ జీవించలేరు. కానీ, మనుషులు సహజ వనరులను నాశనం చేస్తున్నారు. ఇలాంటి సమయంలో నేను ప్రేక్షకుడిలా ఉండలేను’ అంటూ తన సెల్‌ఫోన్‌లో తనకు తాను వీడియో చిత్రీకరించుకున్నాడు. జవహార్ ఆత్మహత్య అనంతరం అతని జేబుల్లో లభించిన సెల్ ఫోన్ లో ఈ వీడియో ఉన్నట్లు తండ్రి కుమారన్ వెల్లడించారు.

కొడుకు సమాజం కోసం ఇంతటి నిర్ణయం తీసుకుంటాడని తాను ఊహించలేదని కుమారన్ అంటున్నాడు.