వధువుకు అవమానం: పెళ్లి బట్టలు విప్పించి...

సంతోషంతో పెళ్లి పీటలు ఎక్కాల్సిన వధువును ఘోరంగా అవమానించాడు వరుడు. ఆమెకు చర్మ వ్యాధి ఉందంటూ తనకు ఈ పెళ్లి వద్దంటూ గోలచేశాడు. ఈ ఘటన ఉత్తర‌ప్రదేశ్‌లోని మహోబా జిల్లాలో చోటుచేసుకుంది. మహోబా జిల్లాకు చెందిన జైహింద్ అనే యువకుడికి, తీజా అనే అమ్మాయితో పెళ్లి కుదిరింది. బంధుమిత్రులతో కల్యాణ మండపం సందడిగా ఉంది. ఇంతలో పెళ్లి కొడుకు జైహింద్ నాకీ పెళ్లి వద్దని చెప్పి అందరికీ షాకిచ్చాడు. పెళ్లి కూతురికి బొల్లి వ్యాధి ఉందని, అందుకే తనకీ పెళ్లి వద్దని పేర్కొన్నాడు. తనకు ఎలాంటి చర్మ వ్యాధి లేదని, సంపూర్ణ ఆరోగ్యవంతురాలినని ఆమె చెప్పినా వినిపించుకోలేదు. అంతే కాదు ఆమె తల్లిదండ్రులు కూడా అతడిని బతిమిలాడినా పట్టించుకోలేదు.

వధువు కుటుంబం అంటే గిట్టని వారు చెప్పిన అబద్దాన్ని వరుడు నిజమని నమ్మి ఆమెను అవమానించాడు. పెళ్లి రద్దు చేయాలని వరుడు డిమాండ్ చేయడంతో వధువు తండ్రి వీరిపై పోలీసులకు ఫిర్యాదు చేశాడు. ఇరు కుటుంబాలను పోలీస్ స్టేషన్‌కు పిలిపించి పోలీసులు చర్చించారు. వరుడు కుటుంబానికి చెందిన మహిళలతో వధువును ఒక గదిలోకి పంపి తనిఖీ చేయించారు. ఆమెకు ఎలాంటి ల్యూకోడెర్మా లేదని వారు గుర్తించడంతో వరుడు పెళ్లికి అంగీకరించాడు. పోలీస్ స్టేషన్ నుంచి మండపానికి చేరుకున్న జైహింద్ వధువు కుటుంబానికి క్షమాపణలు చెప్పడంతో గొడవ సద్దుమణిగింది. అతడిపై పెట్టిన కేసును కూడా వాపస్ తీసుకోవడంతో వివాహం సాఫీగా సాగిపోయిందని స్టేషన్ హౌస్ ఆఫీసర్ రీటా సింగ్ తెలిపారు.