వరదలో.. కార్లోనే ఉండిపోతే.. ఏం చేయాలి?

భారీ వర్షాల కారణంగా ముంబై నగరాన్ని వరదలు ముంచెత్తాయి. వరద వచ్చిన సమయంలో కార్లో ఉన్న ప్రియమ్ మైంథియా అనే 28 లాయర్ బుధవారం ఉదయం విగత జీవిగా కనిపించాడు. ఊపిరి ఆడకపోవడం వల్లే అతడు మరణించి ఉంటాడని పోలీసులు భావిస్తున్నారు. కార్బన్ మోనాక్సైడ్ స్థాయిలు పెరిగిపోవడం వల్లే అతడు చనిపోయి ఉంటాడని ఆటోమొబైల్ నిపుణుడైన తుతు ధావన్ భావిస్తున్నారు. ‘కారు రన్నింగ్‌లో ఉంచి ఏసీ ఆన్‌లో ఉంచి ఉంటాడు. ఎగ్జాస్ట్ నుంచి కార్బన్ మోనాక్సైడ్ లోపలికి రావడంతో అతడు చనిపోయి ఉంటాడ’ని ఆయన గట్టిగా చెబుతున్నారు.

అర్ధ రాత్రి దాటాక కొందరు వ్యక్తులు ప్రియమ్‌ కార్లో ఉండగా చూశారని, బయటకు రావాల్సిందిగా సూచించగా.. అతడు నిరాకరించాడని పోలీసులు చెబుతున్నారు. తెల్లవారాక అతడు కార్లో చనిపోయి ఉండటాన్ని పోలీసులు గుర్తించారు. ఇలాంటి సందర్భాల్లో కార్లో ఏసీ వాడుతున్నట్లయితే.. ఫ్రెష్ ఎయిర్ మోడ్‌లో ఉంచాలి లేదంటే.. కారు అద్దాలను రెండు అంగుళాల మేర కిందకు దించాలి. దీని వల్ల బయటి నుంచి వెటిలేషన్ లోపలికి వస్తుంది.

వరదలో కారులో చిక్కుకుపోయినప్పుడు ఏం చేయాలంటే..

1. వరద ప్రవాహం పెరుగుతున్నప్పుడు కార్లో ఉండకపోవడమే మంచిది. డోర్‌ను పూర్తిగా మూసేసి కారు లోపలే ఉంటే ముందు బాగానే ఉంటుంది. కానీ కాసేపటి తర్వాత లోపల ఉన్న ఆక్సిజన్ అయిపోవడం వల్ల శ్వాసకు ఇబ్బంది కలుగుతుంది.

2. డోర్ వరకూ వరద వస్తే.. వెంటనే కారును పక్కన ఆపేసి బయటకు వచ్చేయాలి. కార్లోకి నీరు వెళ్తే.. షార్ట్ సర్క్యూట్ అయ్యే ప్రమాదం ఉంది. దీంతో ఎలక్ట్రికల్ భాగాలు పని చేయకపోవడం వల్ల భద్రతాపరమైన ఇబ్బందులు తలెత్తొచ్చు. మీరు కార్లోనే ఇరుక్కొని పోవాల్సి రావచ్చు.

3. కారు దాదాపుగా మునిగిపోయే పరిస్థితి వస్తే.. మీరెంత లోతులో ఉన్నారో తెలియకపోతే..? డోర్ ఓపెన్ చేయవద్దు. నీటి ఒత్తిడి కారణంగా... డోర్ ఓపెన్ చేయగానే.. నీరు బలంగా చేరడంతో కారు మునిగిపోతుంది.

4. కారు మునిగిపోయేలా ఉంటే.. ముందుగా సీట్ బెల్ట్ తీసేయండి. డోర్ తెరుచుకోకపోతే.. అద్దాలను పగలగొట్టయినా బయటకు రండి. కార్లో చిన్న సుత్తి ఉంచుకుంటే ఇలాంటి పరిస్థితిలో పనికొస్తుంది. మోకాలు లేదా బూట్లతోనూ కారు అద్దాల మధ్యలో బలంగా తన్నడం ద్వారా పగలగొట్టేందుకు ప్రయత్నించొచ్చు. కారు ముందు అద్దాలను లామినేట్ చేయడం వల్ల ఇలా పగలగొట్టడం కుదరదు. కాబట్టి కిటికీ అద్దాలనే పగలగొట్టండి.

5. వరదలోనే తప్పనిసరిగా ప్రయాణించాల్సి వస్తే.. కారును మొదటి గేర్‌లో ఉంచి ఎగ్జాస్ట్‌లోకి నీరు పోకుండా చూసుకొని ఇంజిన్ రెవ్ సాధారణంగా కంటే ఎక్కువగా ఉండేలా చూసుకోవాలి.

To Read this in English: Click Here