రేప్ నిందితులకు శిక్ష.. సాక్ష్యాధారంగా వాట్సాప్‌!

అమాయకురాలైన విద్యార్థినిని బెదిరించి, లొంగదీసుకొని రెండేళ్ల పాటు ఆమెపై అత్యాచారం సాగించిన ముగ్గురు మృగాళ్లకు హర్యాణాలోని ఓ కోర్టు వినూత్న పద్ధతిలో శిక్ష విధించింది. వాట్సాప్‌ మెసేజ్‌లు, పరస్పరం పంపించుకున్న అశ్లీల ఫోటోల ఆధారంగా నేరగాళ్లకు కఠిన కారాగార శిక్ష విధించింది. సోనెపట్‌లోని గ్లోబల్‌ జిందాల్‌ యూనివర్సిటీకి చెందిన హార్దిక్‌ సిక్రి, కరణ్‌ ఛబ్రా, వికాస్‌ గార్గ్‌ అనే న్యాయ విద్యార్థులు తమ జూనియర్‌‌పై 2013 నుంచి రెండేళ్ల పాటు అత్యాచారానికి పాల్పడ్డారు. నిందితులు ఆ యువతిని సెల్‌ఫోన్లలో నగ్నంగా చిత్రించి బెదిరించి లోబరుచుకున్నారు. కోరుకున్న చోటుకు రప్పించుకొని బలవంతంగా కోరిక తీర్చుకున్నారు. వాటిని మొబైల్ ఫోన్ల ద్వారా ఒకరి నుంచి మరొకరికి పంపించుకున్నారు.

వారి వెకిలి చేష్టలు, దుర్మార్గపు చర్యలతో విసిగి వేసారిన బాధితురాలు చివరికి 2015 ఏప్రిల్‌లో పోలీసులను ఆశ్రయించింది. పోలీసులు కేసు నమోదు చేసి ముగ్గురు నిందితులనూ అరెస్టు చేశారు. తాజాగా అడిషనల్‌ సెషన్స్‌ జడ్జి సునితా గ్రోవర్‌.. ప్రధాన ముద్దాయిలైన హార్దిక్‌ సిక్రి, కరణ్‌ ఛాబ్రాకు 20 ఏళ్ల చొప్పున, వారికి సహకరించిన మరో నిందితుడు వికాస్‌ గార్గ్‌కు ఏడేళ్ల జైలు శిక్ష విధిస్తూ తీర్పు వెలువరించారు.

బాధితురాలిని భయపెట్టి అఘాయిత్యానికి పాల్పడ్డారనడానికి ఎలక్ట్రానిక్‌ సమాచారంలో లభించిన ఆధారాలను విశ్వసిస్తున్నట్లు న్యాయమూర్తి పేర్కొన్నారు. నేర విచారణలో ఎలక్ట్రానిక్‌ సమాచారాన్ని సాక్ష్యంగా పరిగణించడం దేశంలో ఇదే తొలిసారి.