నగరాల్లో విస్తరిస్తున్న ఉమ్మడి కుటుంబాలు!

పూర్వ కాలంలో అనేక తరాలకు చెందిన వ్యక్తులు ఒకే కుటుంబంలో కలిసి జీవించేవారు. అయితే కాలానుగుణంగా వచ్చిన మార్పుల వల్ల ఉమ్మడి కుటుంబాలు విచ్చన్నమై, చిన్న కుటుంబం అనే భావన ఏర్పడింది. కానీ దీని ఆవశ్యకతను గుర్తించిన నేటితరం ఉమ్మడి కుటుంబాల సంస్కృతికి మొగ్గుచూపుతోంది. పిల్లల సంరక్షణ, పెద్దలకు సహకారం, పెరుగుతున్న ఖర్చులు లాంటి కారణంతో సోదరులు, తల్లిదండ్రులతో కలిసి ఉండటానికి ఇష్టపడుతున్నారు. గతంలో ఈ వ్యవస్థలు గ్రామీణ ప్రాంతాల్లో అధికంగా ఉండేవి. ఇటీవల ప్రభుత్వం విడుదల చేసిన నివేదిక ప్రకారం గ్రామీణ ప్రాంతాల్లో ఉమ్మడి కుటుంబాలు విచ్చన్నమవుతుంటే, నగరాల్లో మాత్రం ఉమ్మడిగా జీవించడానికి అలవాటు పడుతున్నారు. 2001 నుంచి 2011 మధ్య పట్టణాలో వీరి సంఖ్య 29 శాతం పెరిగితే, గ్రామీణ ప్రాంతాల్లో కేవలం 2 శాతం మాత్రమే ఉన్నట్లు తేలింది.

ఒకప్పుడు ఉమ్మడి కుటుంబంలో తోబుట్టువులతో కలిసి అనుబంధాలను పంచుకుంటే, ఇప్పుడు మాత్రం అవివాహిత బంధువులను తమతో కలుపుకుంటున్నారు. ఉపాధి కోసం వలసల కారణంగా వృద్ధులు, పిల్లల సంరక్షణ, వనరులు పరిమితంగా ఉండటం లాంటి కారణాలతో పట్టణాల్లో ఈ వ్యవస్థలు ఏర్పడుతున్నాయి.నగరాల్లో ఉమ్మడి కుటుంబాల ధోరణిలో ఆశ్చర్యపడాల్సిన అవసరం లేదని ఢిల్లీ స్కూల్ ఆఫ్ ఎకనామిక్‌కు చెందిన సామాజిక శాస్త్రవేత్త రజనీ పాల్రివాలా అన్నారు. ఎందుకంటే పెరుగుతున్న వ్యయంతోపాటు మహిళలు కూడా ఉద్యోగాలు చేయాల్సి వస్తుంది.... దీని వల్ల ఇల్లు, పిల్లలు, వృద్ధుల సంరక్షణకు ఇబ్బందులు తప్పడం లేదు, ఇవే ఉమ్మడి కుటుంబాలు నగరంలో విస్తరించానికి కారణమని తెలిపారు.

పెద్దలు దూరంగా ఉంటే ఎలా ఉన్నారనే ఆందోళన వెంటాడుతుంది... అదే మా దగ్గర ఉంటే వారి గురించి దిగులే ఉండదని ఢిల్లీకి చెందిన గజేంద్ర సింగ్ అనే వ్యక్తి తెలిపాడు. దీని వల్ల అందరం కలిసి ఉన్నామనే సంతోషంతో ఎలాంటి ఒత్తిడి ఉండదని అన్నాడు. కొన్ని విషయాల్లో సర్దుబాటు, స్వేచ్ఛకు ఇబ్బంది కలిగినా బాధ్యతలు పంచుకోవడం, సహకారం, ఆరోగ్యకరమైన చర్చలు, అనుబంధాలు, ఆప్యాయతలు మరింత పెరుగుతాయని ఉమ్మడిగా జీవించే వ్యక్తులు తెలుపుతున్నారు. చిన్న కుటుంబం... చింతలేని కుటుంబం నినాదం మానవ సంబంధాలపై తీవ్ర ప్రభావం చూపిందనే చెప్పవచ్చు. ఈ నినాదం ఉద్దేశం జనాభా నియంత్రణ కోసమే. కానీ ఇప్పుడిప్పుడే పురాతన ఆచారాలు, సంప్రదాయలను మళ్లీ ఒంటబట్టించుకుని అనుబంధాలు విలువ తెలుసుకుంటున్నారు.