అక్రమసంబంధం, భర్తకు విషాన్ని ఎక్కించిన నర్సు!

​ఆమె ఒక నర్సు.. వైద్యం విషయంలో ప్రాథమిక అవగాహన ఉంది. మరి ఈ టాలెంట్ ను భర్తను చంపడంలో ప్రదర్శించింది! అక్రమ సంబంధానికి అడ్డుగా ఉన్నాడని భర్తకి విషాన్ని ఇంజెక్ట్ చేసి, హత్య చేసిన ఒక నర్సు ఉదంతం ఇది. పశ్చిమగోదావరి జిల్లా దేవరపల్లిలో బుధవారం ఈ వ్యవహారం వెలుగులోకి వచ్చింది. గత నెల 29 వ తేదీన దేవరపల్లి మండలంలోని నిర్మలగిరి క్షేత్రంలో ఒక వ్యక్తి మృత‌దేహాన్ని గుర్తించారు పోలీసులు. ఆ విషయంలో విచారణ చేపట్టగా.. అసలు విషయం వెలుగులోకి వచ్చింది.

పోలీసుల కథనం మేరకు.. మృతుడి పేరు చేగొండి భీమశంకరం. వయసు పాతికేళ్లే. ఏడాది కిందట అతడికి జయలక్ష్మి అనే నర్సుతో వివాహం జరిగింది. అయితే ఒక ప్రైవేట్ హాస్పిటల్ లో పని చేసే జయలక్ష్మికి అక్కడే పనిచేసే వీరేష్ అనే వ్యక్తితో అక్రమసంబంధం ఏర్పడింది. ఈ క్రమంలో భర్తను అడ్డు తొలగించుకోవాలని ఆమె భావించింది.

ఆగస్టు 29 వ తేదీన భర్తను తీసుకుని ఆమె నిర్మలగిరి క్షేత్రానికి వెళ్లింది. అక్కడ అతడు స్వల్ప అస్వస్థతకు గురి కావడంతో.. మేలు చేస్తుందని ఒక ఇంజక్షన్ వేసింది. అతడిని చంపాలనే ఉద్దేశంతోనే విషపూరితమైన మందును ఆమె అతడికి ఇంజెక్ట్ చేసింది. దీంతో భీమశంకరం అక్కడిక్కడే మరణించాడు. మృత‌దేహాన్ని కూడా అక్కడే వదిలేసి జయలక్ష్మి తన ప్రియుడు వీరేష్ తో కలిసి ఉడాయించింది.

విచారణలో మొత్తం వ్యవహారాన్ని తేల్చిన పోలీసులు జయలక్ష్మిని ఆమె ప్రియుడు వీరేష్ ను అదుపులోకి తీసుకున్నారు.