వేధించినోడిని పరిగెత్తించి మరీ పట్టుకుని తాట తీసింది

మార్కెట్‌లో తనని వేధించినోడిని మొదట లైట్ తీసుకున్న ఓ 27 ఏళ్ల యువతి అతడు తన పిచ్చి వేషాలు ఎంతకీ ఆపకపోవడంతో అపరకాళిక అవతారమెత్తింది. సినీ ఫక్కీలో వాడిని వెంటాడి, వేటాడి పట్టుకుని మరీ తాటతీసింది. తప్పయిపోయింది క్షమించమని అతడు వేడుకున్నా ఆమె మాత్రం నో కాంప్రమైజ్ అంటూ వాడి కాలర్ పట్టుకుని నలుగురు మధ్యలోకి లాక్కొచ్చింది. అప్పటివరకు ఈ సీన్‌లోకి తమకి ఎంట్రీ లేదన్నట్టుగా సినిమా చూస్తున్నట్టు ఈ చేజింగ్ సీన్‌ని కళ్లప్పగించి చూస్తున్న వాళ్లంతా అప్పుడు సీన్‌లోకి ఎంటరై ఆ ఈవ్ టీజర్ వీపుపై దరువేశారు. ఎప్పటిలాగే వాడికి దేహశుద్ధి చేసి పోలీసులకి అప్పగించారు.

చెన్నైలోని తైయూర్ మార్కెట్‌లో శుక్రవారం చోటుచేసుకున్న ఈ రియల్ సీన్‌లో అపరాకాళిక అవతారమెత్తిన యువతి పేరు శృతి రంజిత్. కేరళకి చెందిన శృతి రంజిత్ చెన్నైలో వుంటున్నారు. శుక్రవారం మార్కెట్‌కి వెళ్లిన శృతిని తన మాటలతో వేధించడం మొదలుపెట్టాడు ఈవ్ టీజర్. మొదట అతడిని లైట్ తీసుకున్న శృతికి ఆ తర్వాత అతడి ప్రవర్తన పట్టలేనంత కోపం తెప్పించింది. ఇంకేం అప్పటివరకు ఎంతో కూల్‌గా ఓపిక పట్టిన శృతి ఆ తర్వాత అతడిని పట్టుకునేందుకు ప్రయత్నించింది.

సీన్ సితార కాబోతుందని గ్రహించిన ఈవ్ టీజర్ సీన్‌లోంచి ఎస్కేప్ అయ్యేందుకు ట్రై చేశాడు. కాళ్లకి పని చెప్పి ఆమెకి అందకుండా పారిపోవాలనుకున్నాడు. కానీ ఎలాగైనా ఈవ్ టీజర్‌ని పట్టుకోవాలన్న ఆమె కసి ముందు పారిపోవాలన్న వాడి ఎత్తుగడ ఫలించలేదు. పారిపోయే క్రమంలో ఈవ్ టీజర్ గోడలు దూకినా ఆమె అతడిని విడిచిపెట్టలేదు. ఈవ్ టీజర్ దూకిన గోడలనే దాటుతూ వెళ్లి ఎలాగోలా వాడి కాలర్ పట్టుకుంది. ఈవ్ టీజర్‌ని పట్టుకోవాల్సిందిగా అప్పటివరకు కొంతమంది మహిళలు అరిచినప్పటికీ తమకేమీ పట్టనట్టుగా వున్న స్థానికులు అప్పుడు సీన్‌లోకి ఎంటరై వాడి ఒళ్లు హూనం చేశారు.

యువతిని వేధించిన ఈవ్ టీజర్‌ని మణి అనే స్థానిక డ్రైవర్‌గా గుర్తించారు అతడిని అదుపులోకి తీసుకున్న కెలంబక్కం పోలీసులు. అనంతరం మణిని కోర్టులో హాజరుపరిచి, కోర్టు ఆదేశాల ప్రకారం జైలుకి తరలించారు.