ప్రియుడితో కలిసి భర్తను హతమార్చిన భార్యకు కారాగార శిక్ష!

పక్కంటి వ్యక్తితో వివాహేతర సంబంధం పెట్టుకుని భర్తను అత్యంత కిరాతకంగా హత్యచేసిన మహిళకు న్యాయస్థానం 30 ఏళ్ల కఠిన కారాగార శిక్ష విధించింది. ప్రియుడి సాయంతో హత్య చేసి, తర్వాత అతడి శరీరాన్ని ఎనిమిది ముక్కలుగా నరికి తల నుంచి మొండాన్ని వేరుచేసింది. వివరాల్లోకి వెళ్తే హరియాణాలోని ఝజ్జర్ జిల్లా అసంద్ గ్రామానికి చెందిన పూజ, బల్జీత్ సింగ్‌ భార్యభర్తలు. పక్కంటి వ్యక్తితో వివాహేతర సంబంధం పెట్టుకున్న పూజ తన భర్త అడ్డు తొలగించుకోవడానికి పథకం వేసింది. ప్రియుడితో కలిసి భర్తను హత్యచేసి, ముక్కలుగా నరికి సూట్‌కేస్‌లో పెట్టి ఇంటిలోని ఓ గదిలో దాచిపెట్టింది. అయితే కొన్ని రోజుల తర్వాత బల్జీత్ కనిపించడం లేదంటూ 2016 ఏప్రిల్ 26న అతడి సోదరుడు కుల్జీత్ సింగ్ పోలీసులకు ఫిర్యాదు చేశాడు.

అదే సమయంలో తన సోదరిలు ఇద్దరితో కలిసి అతడి ఇంటికి వెళ్లి బిల్జీత్ గురించి పూజను అడిగితే ఆమె పొంతనలేని సమాధానం చెప్పింది. దీంతో పూజను అనుమానించిన అతడి సోదరిలు ఇంటిలో నుంచి చెడు వాసన వస్తున్నట్టు గుర్తించారు. దీంతో, తమ సోదరుడి అదృశ్యం వెనుక పూజ హస్తం ఉందనే అనుమానం బలపడటంతో ఆమె పేరును కూడా ఎఫ్ఐఆర్ నమోదుచేశారు. పోలీసుల విచారణ కొనసాగుతుండగానే, కుటుంబ సభ్యుల కూడా దల్జీత్ అచూకీ కోసం ఇంట్లో వెతికినప్పుడు హత్యకు గురయ్యాడనే నిజాన్ని గుర్తించారు. ఈ విషయం గురించి పోలీసులకు తెలియజేయడంతో పూజను అరెస్ట్ చేశారు. ఆమె అరెస్ట్ తర్వాత విచారణలో నిజాలు వెలుగు చూశాయి.

తమ పొరుగున నివసించే వ్యక్తితో శారీరక సంబంధం పెట్టుకున్నానని, అడ్డుతొలగించుకోవడానికి ఇద్దరం కలసి బల్జీత్‌ను హత్యచేసినట్లు అంగీకరించింది. విచారణలో వాదనలు విన్న న్యాయస్థానం... పూజ, ఆమె ప్రియుడు ఇద్దరూ కలిసి పక్కా ప్రణాళికతోనే హత్య చేసినట్లు నిర్ధరించింది. అంతేకాదు ఈ హత్యలో మరో ఇద్దరిని అనుమానించినా పూజ, ఆమె ప్రియుడే ప్రధాన భూమిక పోషించారని అదనపు న్యాయమూర్తి పే ర్కొన్నారు. దోషులకు 30 ఏళ్ల కఠిన కారాగార శిక్ష విధిస్తున్నట్టు జడ్జ్ కోర్టు తీర్పును వెలువరించారు.