టాయిలెట్ కావాలా.. కోరిక తీర్చు: ప్రభుత్వాధికారి నిర్వాకం

తన ఇంట్లో మరుగుదొడ్డు నిర్మించమని అడిగిన 32 ఏళ్ల మహిళను లైంగిక వాంఛ తీర్చమని వేధించిన ప్రభుత్వ అధికారిపై పోలీసులు కేసు నమోదు చేశారు. ఈ ఘటన ఛత్తీస్‌గఢ్‌లోని రాయ్‌గఢ్ జిల్లాలో చోటుచేసుకుంది. రాయ్‌గఢ్‌లోని తెందూదిపాలో ‘క్లీన్ ఇండియా’ పథకం కింద బాధితురాలి ఇంట్లో నిర్మిస్తున్న మరుగుదొడ్డి అక్రమమనీ, దాన్ని వెంటనే నిలిపివేయాలని నవంబర్ 21న మున్సిపల్ కార్పోరేషన్ నోటీసు ఇచ్చింది. దీంతో బాధితురాలు తాను అర్హురాలినని తేల్చుతూ అన్ని ఆధారాలను సబ్ ఇంజినీర్ ఐపీ సారథికి సమర్పించింది.

అయితే తాను పత్రాలు సమర్పించిన తరవాత రోజు సదరు సబ్ ఇంజినీర్ ఫోన్ చేసి అసభ్యకరంగా మాట్లాడినట్లు ఆ మహిళ పోలీసులకు ఫిర్యాదు చేసింది. మరుగుదొడ్డి నిర్మాణానికి అనుమతి కావాలంటే తన లైంగిక వాంఛ తీర్చాలని ఆ అధికారి ఫోన్‌లో అన్నట్లు ఫిర్యాదులో పేర్కొంది. ఒకవేళ దీనికి ఒప్పుకోకపోతే అక్రమ నిర్మాణం పేరుతో ఇంటినీ కూల్చేస్తానని హెచ్చరించాడని వాపోయింది. మహళ ఫిర్యాదు మేరకు కేసు నమోదు చేసుకున్న జుట్మిల్ పోలీసులు దర్యాప్తు చేపట్టారు.