నా కూతుర్ని రాత్రిపూట బయటికి పంపను: కాంగ్రెస్ నేత

నగరంలో ప్రస్తుతం లా అండ్ ఆర్డర్ సక్రమంగానే ఉన్నా తన కూతురిని మాత్రం రాత్రిపూట బయటికి పంపనని ఓ కాంగ్రెస్ నేత అన్నారు. కర్ణాటక ప్రదేశ్ కాంగ్రెస్ కమిటీ వర్కింగ్ ప్రెసిడెంట్ అయిన దినేష్ గుండురావు ఈ వ్యాఖ్యలు చేశారు. ఈ ఏడాది న్యూ ఇయర్ వేడుకల్లో భాగంగా డిసెంబర్ 31 అర్ధరాత్రి బెంగళూరులోని ఎంజీ రోడ్డులో ఆకతాయిలు రెచ్చిపోయారు. రోడ్డుపై వెళ్తున్న అమ్మాయిలను వేధించారు. ఈ సంఘటనలు నగర వాసులను షాక్‌కు గురిచేశాయి. బెంగళూరులో ఆడపిల్లలకు రక్షణ లేదంటూ విపక్షాలు సైతం ప్రభుత్వం‌పై విరుచుకుపడ్డాయి.

అయితే ‘మహిళల రక్షణ’ అంశంపై బుధవారం బెంగళూరులోని మౌంట్ కార్మెల్ కాలేజీలో మిర్రర్ నౌ వార్తా వెబ్‌సైట్ అర్బన్ డిబేట్‌ను నిర్వహించింది. ఈ డిబేట్‌లో పాల్గొన్న దినేష్ మాట్లాడుతూ.. ‘గడిచిన కొన్ని నెలలతో పోలిస్తే బెంగళూరులో లా అండ్ ఆర్డర్ మెరుగుపడింది. కానీ రాత్రిళ్లు నా కూతుర్ని ఎంజీ రోడ్‌కు నేనెట్టి పరిస్థితుల్లోనూ పంపించను’ అని అన్నారు. మగాళ్లు వచ్చి ఏదో ఉద్దరిస్తారని మహిళలు వేచిచూడకూడదని, తమ గళాన్ని గట్టిగా వినిపించాలని రూలింగ్ పార్టీకి చెందిన ఈ మాజీ మంత్రి వ్యాఖ్యానించారు.