రూపమే కాదు, మనసులూ ఒక్కటే.. ఒకే వ్యక్తిని పెళ్లాడనున్న కవలలు!!

ప్రపంచంలో అచ్చుగుద్దినట్లు ఉండే అచ్చమైన కవలలుగా పేరొందిన అన్న, ల్యూసీ డిసింక్వీలు రూపంలోనే కాదు, ఆలోచనలు కూడా ఒక్కటే. వారి మనసులో కూడా ఒకే వ్యక్తికి స్థానమిచ్చి అందరినీ ఆశ్చర్యపరుస్తున్నారు. త్వరలోనే అతడిని పెళ్లి చేసుకోవాలని కవలలిద్దరూ నిర్ణయం తీసుకున్నారు.

ఆ ఇద్దరు ముద్దుగుమ్మలను పెళ్లాడబోతున్న లక్కీ‌ఫెలో పేరు బెన్ బెర్నే. ఆస్ట్రేలియాలోని పెర్త్‌లో నివసిస్తున్న 33 ఏళ్ల అన్న, ల్యూసీలు 2012 నుంచి బెన్‌బెర్నెతో డేటింగ్ చేస్తున్నారు. ఇటీవల ఆస్ట్రేలియా టీవీ షో ‘హ్యూఘెసే’లో పాల్గొన్న అన్న, ల్యూసీలు.. వారు ఎదుర్కొంటున్న సమస్యలను వివరించారు. ‘‘మేమిద్దరం ఒకరినే ప్రేమించాం. అతన్ని త్వరలోనే పెళ్లాడాలని నిర్ణయించుకున్నాం. ఆస్ట్రేలియా చట్టాలు అందుకు ఒప్పుకోవడం లేదు. మేం ఏం చేయాలి?’’ అని ప్రశ్నించారు. ఆ షోలో ఉన్న న్యాయ నిర్ణేతలు ఎవరూ వారికి సరైన పరిష్కారం చూపలేకపోయారు. ‘‘చట్టాన్ని మార్చగలిగితే మేమిద్దరం బెన్‌ను పెళ్లి చేసుకోగలం. ప్రేమ ఎప్పటికీ ప్రేమే. మేమిద్దరం ఎప్పటికైనా బెన్‌నే పెళ్లి చేసుకుంటాం’’ అని కవలలో ఒకరైన అన్న స్పష్టం చేసింది.

వీరిద్దరూ చూసేందుకు ఒకేలా కనిపించడమే కాదు.. ఏ పనిచేసినా ఇద్దరూ కలిసే చేయడం చిన్నప్పటి నుంచి అలవాటు. ఇద్దరు ఒకరినొకరు అద్దంలో చూసుకున్నట్లే ఉండాలని, చిన్న తేడా కూడా ఉండకూడదనే ఉద్దేశంతో పలు సర్జరీలు కూడా చేయించుకున్నారు. కేవలం ప్లాస్టిక్ సర్జరీల కోసమే రూ.1.75 కోట్లు వెచ్చించారు. 20 ఏళ్ల వయస్సులో లిప్ ఫిల్టర్, బ్రెస్ట్ ఇంప్లిమెంట్, ఫేషియల్ టాటూ, స్కిన్ నీడిలింగ్ చేయించుకున్నారు. 14వ సర్జరీ తర్వాత శరీరంలో మార్పులు చేయించుకోవడం మానేశారు. ఒకే వ్యక్తికి మనసిచ్చిన ఆ అక్క చెల్లెల్లు అతన్ని పెళ్లాడేందుకు చట్టం విలన్‌లా మారిందని, వారి సమస్యను అర్థం చేసుకుని చట్టం నుంచి ఉపశమనం కల్పించాలని పలువురు కోరుతున్నారు.